Riflessioni dal 01/01/2021 al 31/01/2021

01/01/2021

Na scena cu nenti di speciali
nasci comu tanti tali e quali
comu pastura ca' arrivamu 'nfretta
ficimu precisu a santa Lisabetta.

Vittimu no la pura umanità
ma anchi di Diu la divinità
Maria Virgini genera', la viu
Matri di Gesù e Matri Diu.

Mosè e Aronni binidiceru
lu populu di Diu in camminu
Maria nun dissi nenti genera'
lu Figliu binidizioni divinta'.

Pi tuttu lu munnu tutti lì genti
quantu ci n'è ni li cuntinenti
cantamu Maria sempri vicina
a lu figliu Gesù Matri divina.

Matri d'u' Paradisu ca' vicinu
nuatri c'aduramu stu Bamminu
nun ni lassari suli pi la via
stari vulemu cu Gesù e cu tia.

Santo Natale all'ottavo giorno
Felice cammino nel 2021 anno nuovo

03/01/2021

Lu nomu ci lu detti a lu Bamminu
lu Patri santu tantu tempu primu
prima ca cuncipissi matri Maria
Giseppi n'appi ordini pi la via.

Accussì lu chiamaru all'ottu jorna
quannu manu sperta la carni taglia
mentri coglinu na guccia di sangu
lu nomu scrivinu 'ncapu lu fogliu.

Nomu di poesia e di pirdunu
nomu di cantu di santu camminu
nomu di medicina e pani duci
nomu timutu, amatu pirchi è luci.

Binnardu ci fici Teologia
Binnardinu cantava e scrivia
'nta nu circu tunnu sulu tri littri
I H S Gesù Sarvaturi.

Mi scurdavu ca' c'era una acca
na cosa nica ca' vali na varca
a lu munnu lu purta' in ogni latu
scrittu disignatu culuratu.

Ora 'nta li chiesi e li cattedrali
tuvagli paramenti e boccali
ni manca na cosa sula di fari
scrivemulu cu lu ferru 'nta lu cori.
GESÙ di L'OMU SARVATURI

04/01/2021

Essiri vulissi 'naddevu di tri anni
a milli e milli farici dumanni
curiusu di sapiri lu munnu
beddu lucenti e misteru tunnu.

Lu Regnu di Diu detti a li nichi
a chiddi d'amuri veri minnichi
li tanti dumanni assicunna'
a cu vulia dintra si li purta'.

Nun facia nenti di speciali
nun ci liggia mancu lu giornali
comu Andrea e Giuvanni
ca' tempu 'nenti cangiaru li panni.

Parlannu a tutti quanti d'u' Signuri
rigalu granni di Diu Amuri
filici li fici e guadagnaru a Simuni
ca' addivinta' Pitrinu pitruni.

Nuatri ca' circamu lu Signuri
pronti semu a cangiari lu cori?
Nenti a Iddu ci addumannamu
cu Iddu stari ni vasta e caminamu

05/01/2021

Lu Vangelu di nostru Signuri
è un beddu trattatu di Amuri
na bona notizia aspittata
avi a divintari vita vissuta.

Lu circamu comu li tri Magi
stamu vicini comu granni pagi
chista Parola è na cosa speciali
si vidi ca' è viventi ni metti l'ali.

Da principio a la fini culuri
Cristu a centru di lu nostru cori
c'è duttrina sapienza sana vita
ni conquista li punti di li ita.

Quannu parla di la so esistenza
veru nun ni putemu fari senza
si nun ci fussi l'avissimu a 'nvintari
sta pagina bedda di nostru Signuri.

Si nun l'amu fattu sino ad ora
liggemulu di mattina a sira
lassamu c'allumina lu camminu
pi nun ristari o scuru a lumicinu.

06/01/2021

N'atra strata pigliaru i sapienti
aviano aduratu lu Regnanti
Gerusalemmi eranu pi tia
e tu li mannasti in periferia.

Na bedda stidda cumeta li guida'
dall'orienti sino a chista terra ca'
aspittavanu stu momentu sullenni
va cangia la vita, lassa cuntenti.

Azzardaru a partiri ni ssi anni
e appiru problemi a Sionni
traseru 'nta la tana di lu lupu
ad azzannalli manca' veru pocu.

Lu stessu Erodi ci detta' la via
Betlemmi, Gesù Giseppi Maria
oru 'ncenzu mirra comu regali
Iddu è Re Omu Diu immortali.

"Homo faber fortunae suae", certu
e travagliamu forti cu stu dittu
facemu tuttu bonu pi la vita
ca' avi 'narma vistuta di zita.

07/01/1021

Celu e terra fici lu Signuri
po' la luci dunata pi favuri
di ca' cumencia la criazioni
cu luci ripiglia la redenzioni.

Luci è Maria puru Gabrieli
scuru vinci lu sonnu d'u Fideli
Betlemmi china di luci divina
e cu la cumeta arrivanu 'ntrina

Torna ancora al lu jumi Giordanu
unni vattia Giuvanni lu cuscinu
po' si l'accumpagna a lu disertu
vincituri di lu scontru apertu.

In Galilea vicinu Neftali
predica arre' di cunversioni
la luci si vitti chiara e china
redenzioni ca' cumencia prima.

Ora passati secoli millenni
la luci d'u' Signuri chidda granni
ni dinchi di biddizza e di bontà
metti focu dintra nui di Carità.

08/01/2021

A chi servi fari così granni
si a cu ti chiama nun arrispunni
sunnu filici l'apostuli turnati
di la missioni tutti gasati.

Riposu ci pripara' lu Signuri
ni lu disertu fora di li muri
ma c'era genti: cumpassioni
mossi Cristu cu na proposizioni.

Consigliaru allura a lu maestru
mannali tutti dintra a lu cannistru
ribalta la parola pi cangiari
datici vuatri a tutti di mangiari.

Li mani 'ntesta: si misiru a pinsari
cu l'avi sti sordi e unni truvari
c'aviti di riserva li interrompi
picca: cincu pani e du purpi.

Ni basta pi tutti facitili assittari
tutti ni mangiaru cu sapuri
cuglieru puru la rimanenza
dudici cesti pisci n'abbunnanza.

Tanti cosi avemu guadagnatu
distaccati assa' di lu passatu
misericordia voli no spitali
Cristu ca' ni consiglia l'essenziali.

10/01/2021

Acchianava sulenni di lu jumi
chiddu ca' era 'nfila pi favuri
vistutu si di la nostra natura
'nsilenziu camina' c'u' peccatura.

A stu puntu pirchi purificatu
dda' si aprinu celi da ogni latu
lu Spiritu scinni supra di Iddu
era a misura perfetta n'aneddu.
Lu Patri fici sentiri so vuci
chiara forti putenti comu luci
"Tu si Figliu Amatu Predilettu
nuddu fori di tia supra lu me pettu.

Nun è privilegiu chista parola
lu vattiu è a la prima ura
avemu dirittu a chiamallu Patri
'nsemula cu Cristu e tutti l'antri.

Na vesti nova ni misi d'incoddu
sannuli aneddu tuttu l'addubbu
un sigillu ni misi cu lu crisma
pi essiri profeti cu carisma.

Chiudemu accussì Natali santu
e puntamu a la cruci cu vantu.

12/01/2021

Lu diavulu lu vitti e ci cridi
rifiuta' serviziu ma ubbidì
ci campa cu li so vicinu a Diu
quannu lu vidi cangia lu vattiu.

O tempiu fa finta di prigari
ma 'ntantu aumenta lu pagari
l'omu ca' costa assa' a lu Signuri
lu spingi a 'nterveniri cu amuri.

Na vuci si sinti cu lu malatu
ma eranu tanti 'nta lu possedutu
ti canusciu ci dissi Nazarenu
vattinni dda' di unni si vinutu.

Statti mutu vattinni tu lu dicu iu
ci dissi Cristu pi lu santu Diu
e chiddu lu sbattiu malamenti
nisci lassa' meraviglia 'nta li genti.

Cu è chistu ca' veni e cumanna
cu n'autorita' di n'atra banna
parlanu accussì 'ngiru unni de je'
e la fama purtaru di Cristu Re.

Cerca Cristu portalu a lu munnu
cu fidi vera e amuri 'ntunnu
porta sana meraviglia puru tu
vincituri d'u' diavulu Belzebù.

13/01/2021

Si rivoluzionariu vo divintari
seguita Cristu sempri ad ascutari
c'è nuddu ca' lu pozza aguagliari
in ogni terra guariri e pridicari.

Lu Tempiu è l'omu 'mperiferia
la sinagoga è na 'nfermeria
li casi nostri su chini di malati facemuli sentiri novitati.

Pitrinu gradi la situazioni
lu ji a circari pi comunicazioni
tutti ti cercanu facemu novità
ni purtamu tutti ca' cu carità.

Avemu tanti meti d'agghicari
viniti cu mia jemu a pridicari
lu Regnu di Diu è granni camminu
di ogni umanità è so' destinu.

A parola nun si metti confinu
a chidda di Diu mai un destinu
veni comu simenta pi la terra
destinata all'omu abbatti ogni serra.

Nun è facili capiri a Cristu
ma si ti manca diventi tristu
cercalu amalu grida di Iddu
in riserva pi tia c'è un pumiddu.

14/01/2021

Quannu ca' tu preghi a lu Signuri
chi vo' da iddu pi veru favuri
vinni 'nterra a purtari sarvizza
miraculu è sulu na carizza.

Nun si scanta tuccari to' feriti
nun s'infetta quannu tocca malati
contravveni a la liggi di Mosè
Iddu è superiuri veru Re.

È normali gridari o' miraculu
fari catina tirallu d'u' baculu
nun ci facemu bonu serviziu
quannu cantamu pi nu' so straziu.

Vinni 'nta terra a vestiri normali
la vita d'ogni jornu tali e quali
ma la fici divintari granni assa'
cu la so prisenza ca' ni trasforma'.

Partì tuttu da principiu do' cori
facennu tuttu sulu pi Amuri
nun veni pi miraculi e prodigi
ni duna grazia di dunari agi.

N'u' silenziu d'a vita d'ogni jornu
facemu na raccolta di ritornu
parlanu puru picca d'u Signuri
'nfittamu però a tutti di so' oduri.

15/01/2021

Tu si pirdunatu tu si guaritu
cussi dissi a l'amicu cunnuciutu
'nta na barella pi l'occasioni
e pi arrivari evoluzioni.

Ci cridianu all'opira d'u Signuri
lì quattru amici cari d'u baruni
nobiltà nun si misura a scudetti
ma cu li doni ca' lu cori detti.

Iddu li lassa' fari pi guariri
nun ci la facia chiù d'u curcari
nun è causa diretta d'u piccatu
ma iva prontamente liberatu.

L'opira di Diu di unni è giustu
chidda di l'omu di unni onestu
Cristu da veru omu e veru Diu
metti 'nsemula li cosi 'nquatrivi'u.

Cu è chissu ca' pirduna piccati
dissiru li chiù vicini a li lati
lu Signuri sempri è sulu lu po' fari
detti all'omu la grazia di aiutari.

Frati, soru ca' semu 'mpantemia
liberamu lu cori d'a mala via
cunnucemuni tutti a lu Signuri
Iddu ni libera sulu pi Amuri.

16/01/2021

Scummoglia li to carti Nazarenu
ora sapemu soccu cuvi 'nsenu
un pedi 'nta lu Tempiu fedeli
l'antru a banchittari cu li gentili.

L'avia chiamatu giustu dda' matina
Levi di Alfeu cu la monetina
cuminatu com'era 'mezzu a strata
cu na centuria romana appuiata.

Susi veni cu mia ci dissi allura
haiu nenti pi fariti censura
haiu bisognu di tia p'u Regnu
mi piaci comu travagli cu 'mpegnu.

Matteu lassa' tuttu e si ni vinni
e pripara' banchettu pi li vannii
li nummari addivintaru pirsuna
vera ricchizza Cristu ca' pirduna.

Religioni nun è scola o travagliari
e mancu canusciri e prigari
ma discepuli essiri d'u Vangelu
Gesù beddu concretu sutta u velu.

Ni ricanusci pi la sofferenza
ni correggi di la tanta 'ncoerenza
ni risana d'a nostra malatia
ni perduna la nostra codardi'a.

17/01/2021

In Egitto vicinu a lu Nilu
s'ammuccia Antoninu cristianu
nun si scanta no chiù vinci' la cruci
'manu a Costantinu cu la luci.

Riccu di beni e granni di cori
sistema' a la soru cu onuri
sulu si ritira' 'nta lu disertu
pi serviri lu Signuri a cori apertu.

Nun fu facili vinciri dda' vita
pirchi' lu diavulu dava 'ntrita
lu tinta' menti, arma e cori
puru 'nta la carni lassa' signali.

Si lamenta' assa' cu lu Signuri
pirchi' nun rispunni a lu me amuri
rischiu di nun ci la fari o sbagliari
tranquillu ca' nun avi unni iri.

Anni assai ci ni detti l'Eternu
tanta di so fama nisci' all'esternu
'nsigna' na vita nova di Vangelu
ca' era tra li righi, granni velu.

Paci purta' tra omini ed armali
un purcidduzzu fu midicinali
pi caminari lu vastuni bastau
c'un campanellu e un beddu Tau.

18/01/2021

A Gesù Cristu l'attaccaru forti
dumanni difficili sinu a la morti
nuddu però lu misi 'ndifficolta'
dottrina so' è troppu forti assa'.

Insegnamentu seriu e sapienti
nun temi critichi o cedimenti
Mosè e i profeti a garanzia
l'autorità nun è mercanzia.

Ddu jornu era di mira lu diunu
fattu da farisei unu ad unu
no' ci dissi cu l'indici susutu
diunari nun si po' cu' lu zitu.

D'unni ci veni sta bedda novità
cu quattru amici grida libertà
"nun gradi' sacrifici e offerti
mi detti un corpu pi farivi perfetti".

Chista vera novità tanta granni
ca' nun si adatta ad autri banni
lu strappu d'u vistutu va cusutu
cu toppa adatta a lu passatu.

Quannu po' ha trasportari lu mustu
mettilu dintra l'utri chiddu giustu
friscu, forti e macari putenti
'nti l'utri vecchiu diventa pirdenti.

Lu Vangelo di la gioia / diventa la gioia di lu Vangelu.

19/01*/2021

Nun si fa e nun si dici
nun c'è spazio pi la cornici
MA DIU UNNI LU METTI
nun tocchi l'ascensuri
nun apri lu purtuni/
nun fa nenti 'ncucina
nun lavi li piatta/
fa li passi tutti cuntati
li fa puru orientati/
ma si lu scecu avi siti
si la vacca va mungiuta/
si ti cadi lu scecu 'nta lu fossu
nun ci eviti di stuccarisi lu cozzu?
metti lu Signuri a lu primu postu
nun c'è spaziu pi tuttu lu restu
SACCIU D'UNNI METTU LU SIGNURI
lu sabatu è di lu Signuri
si nun servi a Iddu perdi l'uri/
lu sabatu po' fari o nun fari tanti così
si Iddu nun è a centru a cu vasi:
Ascutalu, amalu, pirduna pi Iddu
ti duna lu sabatu, la Vita: campi pi Iddu.

20/01/2021

Fu granni lu surdatu Bastianu
amicu forti di Dioclezianu
'mperaturi era chistu regnanti
bastanza bonu pi tutti lì genti.

Ma li cristiani nun li sopportava
pirchi' la so putenza nun adurava
picchissu Iddu li perseguitava
e assai a morti ni mintia.

Bastianu forti d'amicizia
dava a tutti tanta letizia
tanti 'nsigretu, 'nsilenziu ni sarva'
e tutti cu curaggiu li cunsula'.

Lu Palazzu nun gradi' operazioni
e chiama' Bastianu a relazioni
ca' fu cunnannatu a lu martiriu
tuttu pungiutu cu frecci di l'ariu.

Pinsannu ca' era mortu lu lassaru
nobildonne lu sgiuglieru e lu curaru
fu allura di bruttu flagellatu
e ni li catacombi seppellitu.

Bastianu ca' capisci lu duluri
vidi persimu di tuttu lu sapuri
liberani di sta brutta pandemia
fanni forti e vincitura comu tia

21/01/2021

La vurpi nun arriva a la racina
dici è gaghira nun ci avvicina
accussì fici lu figliu d'u' Prefettu
pi Agnesi bedda senza chiù affettu.

Essiri o nun essiri di Cristu
ci dissi ad Agnesina lu Prefettu
ti sarvu iu ci dissi lu picciottu
ti mariti cu mia tuttu a postu.

Sugnu prummisa a Cristu Redenturi
la me vita è tutta 'nta lu so cori
nun c'è motivu pi vutari casacca
staiu beni mi ama avanti varca.

Si la metti accussì c'è na catasta
pi abbrusciariti viva, nuda e basta
e quannu accussì la vitti un paganu
s'avvicina' pi tuccalla cu la manu.

Muri', annivisci' e si cunverti'
po' crisceru li capiddi fu vistuta
ricurreru a la spata a lu coddu
scannata 'mantinenti comu agneddu.

Mancu lu focu pottiru addumari
li parenti la vinniru a pigliari
lu Papa na Basilica ci edifica'
unni è libera, beata, 'nsantita'.

Bedda Agnesi ca' mori pi purezza
aiuta cu lotta pi vera grannizza.

22/01/2021

Quannu ti servi na cosa ti la fa'
l'omu lu chiami cussi comu l'ha
la liggi Cristu bedda si la fici
la usa Iddu prima ca la dici.

L'opira di Cristu no' nun si ferma
camina cu grazza, cori e arma
dopu na notti sana di prigari
ni chiama' dudici pi continuari.

La maggior parti su periferia
omini ca' 'ncuntra' longu la via
quarcunu lu circa' e dda' ci rista'
chista la squatra ca' miraculi fa.

Nun sunnu li megliu di lu munnu
ma mancu vennu di sutta o' funnu
c'è duttrina esperienza poesia
e coppii di frati 'ncumpagnia.

C'è tuttu quantu servi pi lu Regnu
pirchi' l'arma trova lu so guadagnu
su pronti ad arrivari a la fini
nenti ca' segna traccia di confini.

Nun ha finutu mai di chiamari
omini tanti pronti a travagliari
c'è scrittu chiaru lu to' nomu
e pi ognunu c'è riservatu un tronu.

24/01/2021

La duminica è di lu Signuri
si la riserva' Cristu Sarvaturi
ssu jornu risuscita' vita nova
purtannu speranza ad ogni arcova.

Addumanna' 'mptestitu lu corpu
fattu di crita tanta e di riportu
lu purta' supra la cruci a muriri
ni detti sicura di risuscitari.

L'avia dittu prima la Parola
ca' eni ancora la granni scola
ora ni lu dici forti la Vita
nun muremu chiuni semu la zita.

Li primi cristiani lu caperu
ni ficiru lu centru di lu credu
si nun si risortu resti mortu
diventa sapienti statti accortu.

Nun esistia prima era nenti
era la stanchizza di li pirdenti
Cristu ca' 'mperiferia si stetti accura
risuscita' 'ncitta' ma fora li mura.

Chi manca pi essiri fortunatu
Cristu campa pi tia amatu Parola e Pani lu so Amuri
canta e loda a Iddu a tutti l'uri.

25/01/2021

Pauliddu fratuzzu beddu nostru
avisti curaggiu: sulu lu maistru
nun lu vidisti da vivu normali
ti chiama' da risortu: quantu vali.

Nun Lu canuscisti a prima botta
ma ti mintisti pronti senza sosta
facisti tuttu chiddu ca' ti dissi
Anania da orbu aspittasti.

Lu vattiu liva' di l'occhi lu velu
la testa, lu cori versa' a lu celu
nun pirdisti tempu pi nunziari
ca' Gesù è vivu ad aspittari.

A l'Apostuli cuntasti to' duttrina
tuttu lu restu ittasti 'nta cantina
cambiamentu totali facisti
e l'amici di prima cuntrastasti.

Ti misuri a la gogna unni de je'
flagellatu, annigatu, peggiu nun c'è
'nfini t'appellasti a l'imperaturi
pi chiantari da' la cruci d'u' Signuri.

Finisti li to' jorna carzaratu
cuntannu di Cristu risuscitatu
cu la testa tagliata a tri funtani
pirchi' l'omu mangiassi veru pani.

26/01/2021

Davanti a lu Signuri
tutti lì jorna tutti l'uri
nun ti po' mai stancari
si sta da' pi ripusari.

Darre' la purticedda
nica durata bedda
c'è di pani un pezzu
di la sarvizza prezzu.

La granni 'nvenzioni
di ristari 'ncuminioni
muriri risuscitari
lassarisi mangiari.

Pani risurrezioni
copri tutti 'ntenzioni
forza è ad ogni omu
forti reggiri lu remu.

La varca nicaredda
chiù sicura e bedda
porta carricu novanta
chiesa tutta santa.

Duminica panuzzu
iu ni sugnu pezzu
si mi vogliu 'ntegrari
ha stari dà e adurari.

La Chiesa fa l'Eucaristia
l'Eucaristia fa la Chiesa.

28/01/2021

A lu vattiu ti detti na cannila
chi facisti, la purtasti a Manila
ti la detti bedda e addumata
puntualmenti la trovu astutata.

'Nsemula ci misi anchi la Parola
ti vagnavu cu l'acqua di la mola
po' ci misi lu crisma profumatu
ma nun lu sentu chiù è cunfunnutu.

La strata to' era signata d'a cruci
ca' era l'iniziu beddu di la luci
ma nun ci fu versu la cruci scumpari'
la luci di la cannila 'mpallidi'.

Ogni tantu ricurri a lu Signuri
quannu ca' ha bisognu di caluri
ma po' quarcunu ti offri di lu so'
tu ripigli lu caminu a modu to'.

Ora capisciu lu scuru 'nto munnu
pirchi' la luci nun è to' ma di ramunnu
duna largu a Cristu dintra e fora
ti trovi riccu comu a prima ura.

Tira la luci da sutta lu lettu
abbrazza tutti cu tantu affettu
duna a to' frati tuttu, soccu ha
e moltiplica tuttu in libertà.

29/01/2021

Mi susivu 'nta lu cori di la notti
cu lu cori ca' mi battia forti
siminavu frummentu 'nto tirrenu
chi fa crisci o persi tuttu ' 'nchinu.

Sta tranquillu tu ca' ha travagliatu
tuttu è calcolatu e nenti pirdutu
lu semi cadi 'mpurrisci rinasci
nun dipenni di tia lu capisci.

Lu Signuri fici li cosi giusti
di la morti la vita e novi gusti
to' vita è la stessa amicu miu
ogni jornu ha muriri pi Diu.

Lu semi nicu granni pocu 'mporta
porta lu segretu di la vita aperta
basta mettilu 'nta terra giusta
po' aspetta tranquillu pi la festa.

Cosa bedda ni la storia di semi
chiù è nicu chiù versu autu premi
fa spaziu granni a celu e terra
cogli acqua 'ntunnu sta dintra serra.

Signuri si chissu eni lu Regnu
sugnu prontu e subitu m'impegnu.

30/01/2021

FESTA di San Pellegrino vescovo di TRIOKALA
Acchianava Piddirinu a la grutta
la manu a Liberanti cu la gutta
pani ci niga' cu lu furnu chinu
Iddu a la grutta ci sarva' lu Bamminu

Lu tinia forti attaccatu a la cinta
n'avianu picca e l'avianu vinta
sbarrava la strata lu dragu 'nfernali
lu santu fici proposta naturali.

Chiudi l'occhi grapi la vucca
ca' ti ci mettu a Libranti 'mucca
accussì fici lu babbu canazzu
cu vastuni ci taglia' lu cannarozzu.

Vuci 'nfernali lu paisi sinti'
na scossa tremenda li casi scuti'
mentri scinnia 'nta lu strittu bucu
pi agghicari lu mali 'nto tabutu.

Scinnia solenni santu Piddirinu
e tutti ad aspittallu 'nta lu chianu
portu vivu lu destinatu a la morti
cumencia di ca' vita e nova sorti.

'Nto jornu da to' festa t'anuravu
ascutami pirchi' iu ti prigavu
liberani di sta brutta pandemia
tagliaci tu la gula, jettala via.

31/01/2021

Facia scola senza un quattrinu
a picciotti poviri di Torinu
li facia jucari 'nto pratu virdi
cuntava di Gesù ca' muri pi iddi.

Cumincia' sta storia a deci anni
un sonnu di picciotti nichi e granni
sciarra parulazzi e pugna forti
e Iddu reagiva a Diu la sorti.

Giuvanninu no' accussì cu mitezza
ti sugnu na maistra na carizza
cangia' la visioni 'mantinenti
animali feroci ad agneddi bidienti.

Maria la Maistra santa e cara
Gesù ci detti pi guida sicura
autri sonni Chiesa Eucaristia
completaru lu quatru pi la via.

Don Boscu ni muria pi li picciotti
nichi granni boni puru galeotti
tutti pi Iddu scommettinu ancora
lu lignu si fa addrizza di bon ura.

Tuttu addivinta' libru di scola
pedagogia la chiamanu ca' vola
preveni guai fa' crisciri lu beni
fa' boni cristiani e onesti cittadini.

Riflessioni dal 01/02/2021 al 28/02/2021 - Sabato, 27 Febbraio 2021 11:28

Riflessioni dal 01/01/2021 al 31/01/2021 - Sabato, 02 Gennaio 2021 17:15

Riflessioni dal 01/12/2020 al 31/12/2020 - Lunedì, 28 Dicembre 2020 14:20

Riflessioni dal 01/11/2020 al 30/11/2020 - Martedì, 01 Dicembre 2020 09:25

Riflessioni dal 01/10/2020 al 31/10/2020 - Mercoledì, 21 Ottobre 2020 17:32

Riflessioni dal 01/02/2021 al 28/02/2021 - Sabato, 27 Febbraio 2021 11:28

Riflessioni dal 01/01/2021 al 31/01/2021 - Sabato, 02 Gennaio 2021 17:15

Riflessioni dal 01/12/2020 al 31/12/2020 - Lunedì, 28 Dicembre 2020 14:20

Riflessioni dal 01/11/2020 al 30/11/2020 - Martedì, 01 Dicembre 2020 09:25

Riflessioni dal 01/10/2020 al 31/10/2020 - Mercoledì, 21 Ottobre 2020 17:32

La Parrocchia

Contatore Visite

Ultimi Eventi

Calendario Eventi

Ultimi Documenti Pubblicati e Modificati

Riflessioni dal 01/02/2021 al 28/02/2021