Riflessioni dal 01/03/2021 al 31/03/2021

01/03/2021

Vangelo è uno e Verità
'nta la vita è difficili assa'
lu perfettu arriva a lu Patri
Misericordia sicuta la Matri.

Dicinu tutti du la stessa cosa
l'accentu va' unni lu cori riposa
l'omu avi bisognu di perfezioni
senza amuri nun c'è collazioni.

Cussi' è fatta vera perfezioni
si manca amuri è na confezioni
si penni abbunnanti di na banna
resta cu bidisci e cu cumanna.

Gesù ni parla di Diu comu Patri
manca però l'Amuri di la Matri
Luca traduci tuttu in concordia
e riporta tuttu a la Misericordia.

Nun è approssimativu bonacciuni
la pura biddizza diventa cuminioni
perfezioni diventa veru Amuri
omu ca' abbrazza servu e patruni.

Signuri ca' ni sarvi pi amuri
dunani di campari cu timuri
ca' eni l'iniziu di la Sapienza
'nta li cerchi d'u celu è essenza.

03/03/2021

Lu Signuri, lu Maistru

nun si ferma a lu cuncettu
ma lu fa pi precettu
ca' trasmetti cu la vita
festa granni comu zita.

Tuttu veru quantu dissi
Mosè 'nzemula a Giosuè
va osservatu ogni precettu
di scriba o fariseu abiettu.

Attenti però dunni vannu
fannu operi d'ingannu
a lu centru nun c'è Javhe'
ma Iddi pi quantu ci n'è.

Vuatri faciti comu a mia
mettu a centru lu Signuri
moru ogni jornu a lu putiri
di sta terra tutti n'amu a ghiri.

L'urtimu postu è lu megliu
lu serviri è veru cumannu
facitivi furmari pi da'
unni si campa pi l'eternità.

05/03/2021

Sapiri ca' è nuccenti
e ti lu jochi pi nenti
nun è decenti.

Iddu sapi tutti cosi
ti li cunta 'nta na para di fasi
un cuntu di tuttu puntu.

Ti dumanna puru un pariri
comu si nun ci si po' capiri
ma lu capisti e ci rispunnisti.

Na storia ca' si ripeti
'ncapu un mari di tappiti
puntualmenti c'è "focu a mari".

Ti fa rabbia sapiri di periri
e ti accanisci cu chiddu ca' vo fari:
"nun po' campari pi pirdunari".

Signuri, ca' si veru rigalu
si granni difesa da ogni malu
cunverti nostru cori a la Parola
scrivi nostru nomu a la to' scola

06/03/2021

Un Patri avia du beddi figli cari
nun capivanu lu beni di l'Amuri
unu si stanca si ni va luntanu
l'autru resta, ma nun è vicinu.

Unni è lu tesoru c'è lu cori
e lu patri soffri peni d'amuri
sapi però ca' prima o poi torna
e festa sarà granni e adorna.

Un jornu lu vitti di luntanu
curri l'abbrazza ci duna pirdunu
lu lava lu vesti di tuttu puntu
puru l'aneddu ci misi 'ncuntu.

Unu torna e l'autru arrazza
pari lu jocu di cugnu e mazza
chiddu ca' pensa di essiri giustu
resta fora e ci piglia chiù gustu.

Cristu, tu parli a nui di lu Patri
canti a bisugnusi di na matri
portani addevi a lu to' cori
comu è beddu cu tia essiri vivi.

'Nquaresima caminu di ritornu
ni la casa di lu Patri ogni jornu
dicemu l'amarizza d'u' piccatu
ca' ripusamu e pigliamu jatu

07/03/2021

Quannu trasi' a lu Tempiu
vitti l'armali e lu mircatu
parsi ca' ci piglia' un motu.

Cu frusta di corda lu Signuri
jtta' a tutti fora cu arduri
a tutti guasta' la bedda fera
chista è casa di prighiera.

Scribi e farisei mantinenti
chi succedi na sti frangenti
maestru dillu a nu chi c'è
semu ca' a custodia di Jahvè.

Distruditi lu Tempiu ca' brama
tri jorna lu fazzu comu prima
Signuri ha la frevi pi favuri
quarantase' anni pi fallu e li dinari.

Manca' sintonia e cuminioni
mentri parlava di la so passioni
ricordaru l'Apostuli appressu
la vita, morti e lu processu.

Tu nun vo sacrifici Signuri
vo sulu misericordia pi favuri
chistu è adurari in verità
ca' è nostru donu di carità.

08/03/2021

Donna sei tanto grande e tanto vali
canta lu divinu Alighieri
lu canta pi Maria Matri santa
ma c'è ogni donna c'a arrisanta.

Nobili pi natura e pi virtù
di la costula di Adamu ti cria'
Diu stessu a Iddu ti presenta'
chista cumpagna to' pi l'eternità.

Adamu stessu ti desi lu nomu
comu a Iddu ti chiama' cu la "a"
sorti comuni si affrunta allura
generi veru è l'umana natura.

Parti chiù debuli ti chiamanu
comu chiù nobili ti amanu
guai a cu la donna mali tocca
è la partì chiù ricca è la scocca.

Nudda cunnanna ti detti lu Signuri
sulu generari cu duluri
pari modernità e facili s'ammazza
reagiri vulemu: susemu li grazza.

La festa ti fannu na vota l'annu
a cu popula cu gioia lu munnu
caminamu cu occhiu e cori rettu
ti vulemu anurari fora e sutta tettu

10/03/2021

Quannu Micalangilu fini'
la bedda statua di Mosè
lu marteddu 'ntesta ci tira'
parla tu ca' di liggi ni sa assa'.

Bedda sulenni è 'mpunenti
ma nun' avi cori mancu menti
cussi' successi a Mosè veru
na liggi nova ci costrueru.

Passava pi originali
comu scritta di Diu magistrali
Gesù sti normi voli sfatari
c'è sulu la liggi du Sina'i.

Nun è reazioni ca' cunnanna
ma Grazia di Diu accompagna
e attu ca duna cori e menti
chiddi di Diu onnipotenti.

Misteru granni ammucciatu
chiddu di Diu 'namuratu
fa' beddi, boni cosi nichi
chiddi ca' pi tia su' muddichi.

Si grannizza vo' e autorità
fa' boni cosi nichi assa'
cosi ca' servinu a nenti
omu sinceru, ti fannu putenti.

10*/03/2021

AMU CHISTA CHIESA
cussi' pi comu è - anchi si nun la capisciu - 'ncaminu la canusciu.

Ci criscivu 'nta lu cori - mi affida' lu so destinu - ca' purtavu a lu vicinu.

Bedda comu mamma - e si avi quarchi difettu - lu primu è lu me scopertu.

Nun è fatta sulu a mura -
funnamentu è lu Signuri - pi cu eni Sarvaturi.

Ora ferma o troppu avanti - ma è Matri di li santi - eroi e tanti militanti.

Custodisci lu Misteru - si lu tocchi è pani e vinu - ma è di l'Amuri lu distinu.

Fracassata prisicuta - ma nun temi propriu nenti - resta sempri 'mezzo a' genti.

La so arma è la Parola - pari nenti ma è spola - forma genti e fa ancora scola.
IU AMU CHISTA CHIESA

12/03/2021

Quannu arrivanu i "quaranta jorna"
allura aspetta lu santi ca' torna
San Gisippuzzu lu santu 'ncaminu
cu Maria e Gesuzzu lu Bamminu.

Lu santu d'a divina Provvidenza
Iddu s'arrenni sulu all'evidenza
la Fidi so' è chidda di Abramu
contru ogni speranza caminamu.

Silenziu assurdanti ni trasmetti
vita no di paroli, ma di fatti
cussi' conquista Diu anchi l'omu
cu tanta di opera lu profumu.

La so' fedeltà è cussi pruvata
ca' pari na simenta ammannita
doni priziusi lu Patri ci detti
Gesù e Maria e sunnu prutetti.

Fici fatica a capiri quarcosa
l'angilu aiuta' a sarvari la sposa
po' parsi tuttu facili e sirenu
ma ogni passu era un pantanu.

Un'era nova nasciva cu Iddu
ca' spacca' lu munnu cu so' cuteddu
lu "Si" di Maria ca n'introduci
nu celu novu signatu d'a cruci.

13/03/2021

Acchiana, prigari è comu vulari
sperimenti la gioia di cantari
du omini vannu a lu Tempiu
tutti d'u' addiventanu esempiu.

Dicinu tutti e du' la virita'
cu canta di sé e cu prega Diu dà
unu è chinu di umanità, la so'
l'autru fa spaziu a Diu ca' lu sarvo'.

Osservi la liggi, lu gridi forti
accumuli ligna pi la to' sorti
tanti difetti piccati 'nquantita'
cali la testa e ci dici: sugnu ca'.

Prighiera nun è chiamu e rispunni
comu diri ca' è: scopru li funni
la prighiera cangia sempri la vita
ti rimetti 'ncaminu, n'autra strata.

Giustu nun è cu nun fa mali nenti
ma si aprì a Diu, a la genti
sarvami, ci dici a lu Signuri
vogliu fari beni senza rumuri.

Quaresima na granni avventura
scoperta di Diu e so Parola
nun è duttrina tutta a memoria
ma falla vita, divintari storia.

14/03/2021

Signuri ca' si Patri onnipotenti
pietà ti piglia ora di la genti
stu virus ni sta stuccannu l'ossa
vincilu Tu dunaci forti scossa.

Umanamenti n'avemu unni jiri
tu si Patri nostru Sarvaturi
la scienza arranca e fa fatica
la politica diventa stitica.

Nun sapemu no' cosa dumannari
di fronti a l'ingiustizia di dinari
lu riccu diventa sempri chiù putenti
a lu poviru resta quasi nenti.

Dumannamu ancora di campari
a tia vinnutu pi trenta dinari
di l'amicu ca' mangiava cu tia
e 'ntantu ti vasava e ti tradia.

Puru nuatri ti semu vicini
cu mascherini letti e vaccini
merci di scambio tra campiuna
autentici veri granni latruna.

Cangia tu allura la nostra vita
vulemu completari la partita
cunverti li rovina nazioni
dunani libertà risurrezioni.

15/03/2021

Lu circa' a Cana di Galilea
cu cumannava matina e sira
'nta lu palazzu regali di Erodi
ma tristi pi la malatia di l'eredi.

Ci lu dissi: scinnemu a Cafarnau
c'è l'addevu miu riduttu malu
si nun viditi signi e prodigi
nun criditi mancu pi liggi.

Scinnemu ci dissi: fammi cuntenti
sana me figliu: pi tia è nenti
vatinni, omu, granni è la to fidi
to figliu è sarvu e da' gia' ridi.

Nun si lu fici diri, mantinenti
s'incamina' di mezzu a la genti
vinianu 'ncontru cuntenti du servi
sarvu è, filici senza autri ervi.

Dopo mazzijornu cala' la frevi
e scinni' da lu lettu cu li so pedi
chissa è l'ura ca' Cristu mi parla'
iu ci critti e ora semu chissà.

Cristu ca' nun si stancu di nuatri
ti prigamu pi parenti e amici
cunsola nostru cori tantu affrittu
dunani saluti e cori dirittu.

16/03/2021

Lu firmaru davanti lu Tempiu
ca' purtava barella "scempiu"
era sabatu, festa nun si poti
lu dissi Mosè 'nta li scritti noti.

Nun è curpa mia, mi lu dissi
quannu ca' stava a l'interessi
vo guariri? ma l'angilu, l'acqua
susiti, piglia a barella e camina.

Tuttu veru e mi misi a l'addritta
vuci santa, e vuci biniditta
poviru, nun sacciu diri cu è
la prima volta ca' lu viu com'è.

Sta attentu ca' si scuminicatu
fora di lu Tempiu si ghittatu
lu vitti dopu picca lu Signuri
ricorda ca' si guaritu pi amuri. Superasti ora peni 'nfernali
nun cadiri arre' 'nta li stessi mali
lu canusci', appi connotazioni
e lu cunta' a la deputazioni.

Signuri, pirduna nostri erruri
semu capaci mancu di rumuri
e si beni vulemu ammuttari
aiutani a fallu sulu pi Amuri.

20/03/2021

La tensioni è a li stiddi
hannu un diavulu pi capiddi
s'arabiaru tutti lì Jude'
e mannaru li guardii vide'.

Nun l'arristaru contra cumannu
spiegaru puru pirchi' 'nfunnu
nuddu ha parlatu comu Iddu
parla d'amuri e no di marteddu.

Nu vi vulemu subitu diri:
ligiti la scrittura pi sintiri
Missia nun veni da' Galilea
d'unni eni stu rabbi di trazzera.

Si susi maistru Nicodemu
nun si cunnanna, dicu ca' tremu,
l'imputatu, cu è e soccu dici
e maca'ri l'amicu ca' cunnuci.

Metti puru tu ca' sa la liggi
scordi lu profeta quannu leggi
da Galilea nenti di bonu
da Giudea lu profeta di tronu.

Tuttu chistu è sì l'antifattu
da decisioni a cori ruttu
avi a muriri duna tediu
duna paci a nuddu, nun c'è rimediu.

21/03/2021

Addumannaru a Filippu greci
vulemu vidiri a Gesù la luci
chiama' pi compagnia ad Andrea
e lu dissiru a Gesù ca parlava.

Vinni l'ura d'a gloria di l'Untu
rispunni' lu Signuri a fini cuntu
si lu cocciu di frummentu nun mori
resta sulu e tu cu fami accori.

La vita pi stu munnu vali nenti
si sempri delusu, nun si cuntenti
si la perdi pi mia la ritrovi
'nto Patri eternu ca tuttu novi. Di ghiacciu arristaru quannu dissi
mi scantu Patri miu nenti attrassi
di subitu cangia': pi chissu vinni
glorifica to nomu canni a canni.

Fattu, arrispunni lu Criaturi
fattu e ancora a fari c'u' lavuri
comu un tronu sinterunu lì genti
si scantaru e nun caperu nenti.

Chissa è la Parola pi lu munnu
ca pensa di aviri tuttu 'pugnu
quannu ca' arrivu a mezza via
tutti l'occhi sarannu 'ncapu a mia

22/03/2021

La ittaru da' mezzu comu cosa
di fronti a Cristu 'nta la casa
chi facemu cu sta fimmina com'è
ca' viola' la liggi di Mosè?

Ricorda va subitu lapidata
chi ni dici tu ca' nun si 'ncurdata?
na provocazioni a lu Signuri
mentri scrivia 'ncapu lu maduni.

Ristaru offisi l'omini di liggi
santi da li pedi a li capiddi
allura ni vo diri to pinseru
nu semu 'nta lu giustu pi daveru.

Susi' l'occhi, talia' la tintura,
ca' ittava vilenu pi la via
cu nun avi piccati tira prima
l'antri sicutati comu catina.

Li santi omini di petra armati
si ni ieru tutti vastuniati
nun aspittavanu pi mossa chissa
avianu trovatu motivu pi la fossa.

Nuddu ti cunnanna', ci dissi, donna
mancu iu ti cunnannu, va torna
vivi d'ora in po' santa, sirena
nun piccari chiù: ni vali la pena!

26/03/2021

Un angilu si parti' da li celi
lu so nomu eni Gabrieli
na picciuttedda aspettava da'
Maria la so' identità
maritata cu Giseppi falegnami
discindenti di stirpi regali.

Ti salutu, Maria, ci dissi
tu si china di Diu, l'abissi
nun ti scantari, ti voli beni
ti duna un figliu, lu so', cunveni
Re pi sempri, putenti
figliu di Diu onniputenti.

Nun ci capisciu ci dissi Maria
nun canusciu omu pi la via
chissa è na cosa speciali
cuncezioni ca' nun avi aguali
lu Spiritu ti cummoglia
Iddu opera e tutti sbroglia.

La putenza di Diu scanusciuta
duna a tutti vita rinnuvata
puru to' cuscina Lisabetta
aspetta un figliu, retta
mi fidu, ci dissi, accettu la Parola
sacciu ca' è dura prova.

Lu Verbu Eternu S'Incarna'
tutta la terra santifica'
ora Diu è veru Manueli
e la terra duna latti e meli.

L	M	M	G	V	S	D
27	28	29	30	1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30	31

Riflessioni dal 01/10/2021 al 31/10/2021 - Domenica, 10 Ottobre 2021 11:24

Riflessioni dal 01/09/2021 al 30/09/2021 - Domenica, 10 Ottobre 2021 11:19

Riflessioni del 29/08/2021 al 31/08/2021 - Domenica, 10 Ottobre 2021 11:08

Riflessioni dal 01/07/2021 al 31/07/2021 - Venerdì, 20 Agosto 2021 10:09

Riflessioni dal 01/06/2021 al 30/06/2021 - Venerdì, 20 Agosto 2021 10:00

Riflessioni dal 01/10/2021 al 31/10/2021 - Domenica, 10 Ottobre 2021 11:24

Riflessioni dal 01/09/2021 al 30/09/2021 - Domenica, 10 Ottobre 2021 11:19

Riflessioni del 29/08/2021 al 31/08/2021 - Domenica, 10 Ottobre 2021 11:08

Riflessioni dal 01/07/2021 al 31/07/2021 - Venerdì, 20 Agosto 2021 10:09

Riflessioni dal 01/06/2021 al 30/06/2021 - Venerdì, 20 Agosto 2021 10:00

La Parrocchia

Contatore Visite

Ultimi Eventi

Calendario Eventi

Ultimi Documenti Pubblicati e Modificati

Riflessioni dal 01/10/2021 al 31/10/2021

Riflessioni del 29/08/2021 al 31/08/2021

Riflessioni dal 01/09/2021 al 30/09/2021

Riflessioni dal 01/07/2021 al 31/07/2021

Riflessioni dal 01/05/2021 al 31/05/2021

Riflessioni dal 01/04/2021 al 30/04/2021

Riflessioni dal 01/06/2021 al 30/06/2021