Riflessioni dal 01/02/2021 al 28/02/2021

01/02/2021

Geraseni chi cominastivu
a lu Signuri vi jucastivu
vi dava fastidiu l'infelici
ora quasi la malatia chiangiti.

Facia dannu si facia mali
pi liberallu l'attaccaru a pali
lu Signuri lu sciugli' lu libera'
cu li porci lu diavulu manna'.

'Mpazzuti mischineddi s'affucaru
'nta l'acqua di lu mari si ittaru
legioni addumanna' permissu
ci lu concessi Cristu Iddu stissu.

Nun neganu l'evidenza, prodigiu
lu prigaru: beddu vacci alleggiu
ca' c'è genti brava ca' travaglia
falla luntanu di ca' la to' maglia.

Vegnu cu tia, Signiruzzu santu
ci dicia prigannu lu risanatu
no' vatinni dirittu a casa to'
cunta soccu ti fici l'Amuri so'.

In ogni nostra operazioni
un prezzu di pagari, quantu veni
la nostra sarvizza è già pagata
a la cruci di Cristu è carricata.

03/02/2021

Considerata la to' dibulizza
t'appuiari a quarcunu c'avi forza
nascemu naturali religiosi
spissu turnamu a li nostri così.

Samueli a lu Tempiu proclama'
ca' lu Misia scannalu arriva'
la virita' nun si po' nunziari
Gesù persi picca pi affacciari.

Ritorna lu Signuri a Nazareti
d'unni canuscia tutti li lati
scannalu fici la so duttrina
'nsignata forti e chiara, divina.

Fici puru prodigi e cosi granni
ma la Fidi era picca, si ni vinni
quanta amarizza a stritti denti
difficili travagliari cu parenti.

Pinsannu di sapiri ogni cosa
e di dari cunsigli senza posa
facemu di la Fidi gran cavaddu
ma senza purtari a nuddu 'ncoddu.

La vera fidi granni lezioni
umiltà simplicita' no obiezioni
crisci all'ummira di la Virita'
è la chiu' granni forma di Carità

04/02/2021

Ci fici un pacchiteddu nicu nicu
ci lu misi 'mpettu attaccatu
portalu bonu a li carzarati
ca' hannu ad essiri ammazzati.

Parti' Tarcisiu comu sempri
gudennu la stima di tanti genti
lu Papa ci ni detti chiù di tutti
e Iddu guadagna' tra vivi e morti.

Lu firmaru cumpagni pi jucari
ma Iddu si scherni': nun pozzu stari
caperu ca' purtava lu misteru
tiniva so' occhi versu lu celu.

Violenza ci ficiru assa' forti
na petra 'ntesta lu purta' a la morti
un surdatu ca' era cristianu
lu purta' a lu Papa strittu 'manu.

Sulu allura li manu grapia
lu primu martiri di l'Eucaristia
Tarcisiu santu gloria e vantu
ni la chiesa si merita' un cantu.

Pani di gloria e di duluri
Cristu Gesuzzu nostru Sarvaturi
Tu ca' susteni l'arma e lu cori fanni stari cu tia a tutti l'uri

05/02/2021

Agatina divota cu lu velu
troppu canusciuta 'nterra e 'ncelu
nun si scanta di cunfissari Cristu
anchi si l'orizzonti si fa tristu.

Quinzianu servi devotu l'Imperu
e arresta Agatina pi daveru
mentri ci scappava di tutti lati
Iddu la rintraccia cu li so' vati.

L'affrunta cu brutti seduzioni
Afrodisia senza condizioni
ma dopu un misi di dura prova
avi la testa dura comu lava.

Vinni torturata a ferri curti
acuminati e roventi di notti
ci scipparu p'insina lu pettu
San Petru ci lu riduna di nettu.

Nun ci vittiru chiù li aguzzini
ficiru catasta ligna e carvuni
pi cocila viva tra ferru e focu
pi lu russu velu nun ci fu locu.

Agata ca' si' 'nta gloria d'u' celu
prestani ancora lu russu velu
lu mittemu davanti a li casi
cu tia 'mezzu lu virus nun trasi

08/02/2021

Giuseppina Bakhita
la chiamaru Fortunata
Idda arrubata e vinnuta
p'insina torturata.

Di patruna ni passa' tanti
lu Consuli talianu anchi
ca' la rigala' a l'amicu chiù caru
nun la cidia mancu pi dinaru.

Si sappi difenniri davveru
ammucciarisi la cruci puru
lu Patriarca di Venezia
la fici libera pi liggi e letizia.

in Sudan era nasciuta
a Venezia libera è pasciuta
'nta li monachi di Canossa
in Cristu survi' a tutti carni e ossa.

Munachedda di cioccolata
genti ca' curri pi na vasata
mischina no, veru fortunata
ora cristiana vattiata.

Carthum ci duna la vita
l'Italia ci la duna rinnovata
santificata ca' sunnu vint'anni
rigalu ni fa: 'nsaluti pi tant'anni.

10/02/2021

Chi biddizza lu criatu
'ncelu 'nterra ogni latu
tra lu scuru e la luci
scurrinu jorna e nuci.

Li stajuni e li frutti
tra li juri e l'arvulotti
lu lavuri si fa granu
a la fami ci duna na manu.

Li muntagni e li vallati
l'acqua frisca pi la siti
terra libera e furesti
senza idda tu nun arresti.

E la terra ca' s'ammuccia
cosi boni a cannuccia
pi biddizza e forza granni
energia pi tutti banni.

E li tanti arvuliddi
tanti frutti nicareddi
e li fogli a catina
pirchi' sunnu medicina.

Quantu juri poi 'ntunnu
'nta stu sanu e beddu munnu
culurati e profumati
beddi boni e tantu amati.

Ogni jornu dicemu Grazii
pi lu dijunu e pi li sazii.

13/02/2021

"DIU esisti - iu Lu 'ncuntravu"
Era stancu di aspittari
accussì ci parsi a lu cumpari
davanti la Cappella di Paris
trasi' scumpari' ricumpari'.

Eranu li cincu e deci
ci bastaru pi vidiri la Luci
li cannili vicini a lu Signuri
la Fidi 'nfunnu a lu so cori.

Cinc'anni passaru o' picciottu
va nisci' sulu cu cappottu
circannu diversivu pocu onestu
e detti o' poviru tuttu lestu.

A vint'anni l'amicu sinceru
circava 'nta a Chiesa davveru
ci parsi ca' tarda' l'eternità
lu Signuri l'aspettava 'nverita'.

Ci bastaru cincu minuti
assapura' così mai canusciuti
Cristu 'nta lu pani eni tuttu
cridenti o no è certu fattu.

Fu vattiatu e lu cunta' a tutti
"nun cridu" dicia, gnoranti e dotti
Lu 'ncuntravu e chistu cangia
la me vita è chidda di la Francia

15/02/2021

Signuri, quarcunu vulia eliminari li poviri e Tu ci dicisti: li poviri sempri ci saranno.

Quarcunu vulia cogliri lu giogliu di 'mezzu a lu lavuri: lassa ca' criscinu 'nsemula dicisti.

Quarcunu cancellari vulia la malatia, ascutali, risanali: iamuninni cunsigliasti e la lassasti.

Tutti cosi boni Tu facisti;
tuttu chistu pi nuatri lu dicisti.
Poviru, malatu, piccaturi, pi tia e ti tutti avemu un postu pi arrutari.

Prigamu e n'ascuti - ritardamu e n'aspetti - ni allurdamu e mi lavi - libbrusi e ni tocchi - sciarriati e ni duni paci - accusati e scrivi assoluzioni - crucifissi cu Tia e ni porti 'mparadisu.
GRAZII, SIGNURI.

17/02/2021

Tutti pronti amici cari
carnivali rista' a mari
ni mittemu diritti in riga
ora si parti pi la cima.

Mittemuni in tinuta
di atleti cu la tuta
si nun chiovi e tira ventu
anchi panda e maglia centu.

Lu tragittu è articulatu
tra disertu e cultivatu
sosta 'ncitta' senza primura
finemu po' fora li mura.

C'è 'nimpegnu ben precisu
un annunziu forti decisu
Cristu vivu Cristu risuscita'
di ca' parti ogni Verità.

Lu via lu duna lu Vangelu
cunversioni e cori 'ncelu
signu concretu l'accumpagna
cinniri 'ntesta senza bagna.

Quaranta jorna esattamenti
arriva l'acqua caldamenti
pi lavari li pedi assa' stanchi
e ripusarisi fora la vanchi.

19/02/2021

Pirchi' dijuni si nun ci cridi
ti sciarrii mentri ca' ridi
vo la giustizia di l'autri
a tia nun ti sfiora e fa sauti.

Lu stissu vali pi l'orazioni
e macari pi la condivisioni
nun si spartinu sti tri cosi
fannu giusti granni e carusi.

Si fa dijunu senza carità
ti vo fari vidiri ma nun va
si lu fa e nun ti ammucci
duni a mangiari a li surci.

La carità veni di lu dijunu
crisci all'ummira d'u luminu
ca' è luci di lu Signuri
e duna spaziu a li criaturi.

Tutti tri fammu un camminu
ca' nun è pi monacu e parrinu
è la scelta di Cristu Sarvaturi
purtannu la to cruci cu amuri. Quaresima è caminu di virtù
ti fa crisciri comu un bambu'
ti pripara 'ncelu a cantari
e ti fornisci di ali pi vulari

20/02/2021

Lu saziu nun cridi a cu dijuna
lu sanu nun cridi a li malanna
Cristu cussi' scigli' l'urtimu postu
tutto a postu anchi ad Agustu.

Levi pubblicanu da' 'nta la strata
cu na pattuglia manu armata
Gesù lu chiama' "veni cu mia"
nun ci pinsa' du voti e lu seguia.

E festeggia' lu cambiamentu
trasuta cu Cristu a lu Cummentu
arriva' un saccu di pubblicani
e dinchi' la casa 'ntutti li vani.

Farisei e scribi genti giusti
vittiru la cosa e ficiru frusti
nun è giustu stari cu piccatura
nun è chista di Diu la natura.

Veru è ci dissi lu Signuri
nuddu misca santu e piccaturi
di medicu bisogna lu malatu
a cu mi cerca sugnu o so' latu.

Fari santamenti la quaresima
senza criarini mancu na fisima
piccatura semu in cunversioni
e superari 'nCristu li situazioni.

23/02/2021

Patri nostru ca' siti 'nta li celi
la lodi a lu vostru nomu sali
lu vostru Regnu venga 'mezzu a nu
la vostra volontà sia fatta
comu 'ncelu cussi' 'nterra.

Duna a nu lu pani di ogni jornu
pirdunani tutti lì piccati
comu facemu nu 'ntra di nuatri
nun ni lassari 'nta la tintazioni
e libera tutti nu da ogni mali.

Chista prighiera Gesù ni 'nsigna'
prighiera bona e bella assa'
ca' riunisci santi e piccatura
ca' nun talia cridenti di paura.

Nun escludi mancu miscredenti
mancu alluntana atei attenti
nun distanzia omu e donna
comu si vesti pantaluni o gonna.

Patri nostru ca' siti 'nta li celi
'nta vucca nostra zuccari e meli
lu munnu unitu è 'npocu chiù umanu
cu na sula Parola Bibbia 'manu.

27/02/2021

Francisco ti chiamaru a lu fonti
di cugnomu facivatu Possenti
papà Sante mamma Agnese
ti presentaru a tutti: arnese.

Papà ca travagliava 'nVaticanu
ti rinnia lu munnu sempri chianu
na pena ti purtava si daccapu
mamma e la Madonna su' da' 'ncapu.

Destinatu a granni operazioni
tu avivi nummari e disposizioni
ma a Spoletu ci fu na sterzata
propriu 'nPrucussioni: l'Addulurata.

Gabrieli allura ti chiamasti
'nta la famiglia di li Passionisti
e cu lu jornu di la to' chiamata
ci juncisti di Maria Addulurata.

Tantu vulia Paulu di la cruci
e tu: rinunziu puru a li nuci
Isola Gran Sassu nun t'astuta'
to' vita curta e ricca ti risuscita'.

Gabrieli arroba cori ti chiamaru
in vita e in morti santu raru
l'Abbruzzu ti vosi so' Patrunu
li picciotti da' ti porti unu ad unu.

28/02/2021

Rispunnivu giustu a la dumanna
Tu si Cristu di Diu ca' nun cunnanna
nun capivu precisu soccu era
gradi' la Parola ca vali ancora.

Du' jornu in tri ni chiama'
e in montagna uata ni purta'
Gesù trasi' 'ngloria risplendenti
Mosè ed Elia a latu cuntenti.

Na casa ca' nuddu mai avia vistu
era veru chiddu ca' dissi: Cristu
vulia ristari dà pi tanti anni
e ci dissi: facemu tri capanni.

La neglia arriva' ni scantamu
na vuci putenti comu tronu
"chissu è me Figliu ca iu amu
ascutatilu sempri è lu chiù bonu.

Nun sacciu chi tempu ni passa'
ma eramu cu Cristu sulu dà
ni dissi nun dicitilu a nuddu
finu a quannu ritornu chiù beddu.

Biddizza ca' conquisti tutti 'ntunnu
ca' ripigli l'omu di lu funnu
a tia cunsacramu vita nostra
tu la abiti e ogni cosa allustra

L	M	M	G	V	S	D
27	28	29	30	1	2	3
4	5	6	7	8	9	10
11	12	13	14	15	16	17
18	19	20	21	22	23	24
25	26	27	28	29	30	31

L	M	M	G	V	S	D
1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30	1	2	3	4	5

Riflessioni dal 01/10/2021 al 31/10/2021 - Domenica, 10 Ottobre 2021 11:24

Riflessioni dal 01/09/2021 al 30/09/2021 - Domenica, 10 Ottobre 2021 11:19

Riflessioni del 29/08/2021 al 31/08/2021 - Domenica, 10 Ottobre 2021 11:08

Riflessioni dal 01/07/2021 al 31/07/2021 - Venerdì, 20 Agosto 2021 10:09

Riflessioni dal 01/06/2021 al 30/06/2021 - Venerdì, 20 Agosto 2021 10:00

Riflessioni dal 01/10/2021 al 31/10/2021 - Domenica, 10 Ottobre 2021 11:24

Riflessioni dal 01/09/2021 al 30/09/2021 - Domenica, 10 Ottobre 2021 11:19

Riflessioni del 29/08/2021 al 31/08/2021 - Domenica, 10 Ottobre 2021 11:08

Riflessioni dal 01/07/2021 al 31/07/2021 - Venerdì, 20 Agosto 2021 10:09

Riflessioni dal 01/06/2021 al 30/06/2021 - Venerdì, 20 Agosto 2021 10:00

La Parrocchia

Contatore Visite

Ultimi Eventi

Calendario Eventi

Ultimi Documenti Pubblicati e Modificati

Riflessioni dal 01/10/2021 al 31/10/2021

Riflessioni del 29/08/2021 al 31/08/2021

Riflessioni dal 01/09/2021 al 30/09/2021

Riflessioni dal 01/07/2021 al 31/07/2021

Riflessioni dal 01/05/2021 al 31/05/2021

Riflessioni dal 01/04/2021 al 30/04/2021

Riflessioni dal 01/06/2021 al 30/06/2021

Riflessioni dal 01/03/2021 al 31/03/2021