Riflessioni dal 01/12/2020 al 31/12/2020

01/12/2020

Stamattina fici n'uncontru speciali:
nicu fattu omu o era omu fattu nicu?
Certu era beddu simplici splendenti
cu na forza trainanti e travolgenti;
cu Iddu nun si po' nun essiri cuntenti.

Mi dissi: veni danzamu!
nun senti chi musica c'è 'ntunnu?
Stunavu, ma ci detti la manu
e mi sintivu lu munnu chianu
ca' dicia: tu si partì di mia,
ma iu servu a tia.

Ma è realtà o fantasia
mi dissi 'nta lu cori e cu la menti
e Gesù rumpi lu silenzio e canta':
sia lodatu lu patri onnipotenti
ca' cria' lu munnu da lu nenti.

Riserva' lu misteru pi l'amici
ca' sunnu poviri, gnoranti e picciliddi
capaci di vidiri cu lu cori
ca' scopri la putenza di l'Amuri.

Si rivela ni la me prisenza
fatta di cosi nichi ma sustanza
ca' libera lu munnu
di la scienza e lu cumannu
fatti pi serviti a Diu Verita' mai 'ngannu.

02/12/2020

Ca' fu Eva o Pandora
di malanni n'avemu ancora
ca' toccanu, arma, cori
testa, mani e puru pedi.

Gesù veni comu regalu
pi lavari lu granni malu
ma cumencia cu la genti
da lì mali ca' su' nenti.

Nun ni lassa mancu unu
e pi ognunu c'è pirdunu
cussi fici pi tri jorna
pi tutti la speranza torna.

Po' ci detti a mangiari
pani friscu e pisciteddi
pirchi appi cumpassioni
pi turnari 'ncasa sani.

Tu ca' ti facisti Omu
di Maria 'nta lu senu
veni puru 'ncontru a mia
ca' faticu pi la via.

Cridu forti a tia risortu
Redenturi veru portu
vinci tu sta pandemia
l'omu porta a nova via.

15/12/2020

Tra diri e fari c'è 'mezzu u mari
ca' nun è facili attraversari
ci voli curaggiu, granni umanità
ca' fa turnari in piena libertà.

Un patri avi du figli cavigli
dumanna aiutu senza mancu brigli
uno ci dissi No ma si pinti e ci ji
l'autru dissi Si pi finta si capì.

Ora Iddu ti dici: chi tinni pari
cu rinisci lu patri cuntenti a fari
vali si: cu rifletti si cunverti
e lu primu lu fici pi di parti.

Chista lezioni è tutta pi mia
ca' vaiu avanti ad Avi Maria
ma nun fazzu comu la virginedda
ca' camina' sulu 'nta na casedda.

Aiu bisognu di cunvirsioni
turnari a Diu 'ncontinuazioni
manteniri lu passu di li santi
gioia pirdunu e sempri avanti.
17/12/2020

Tuttu chiddu ca' è veru umanu
è tuttu miu ca' è santu e bonu
cussi fici Cristu quannu s'incarna'
abbrazza' sempri tutta l'umanità.

Mattia fa la cunta di li nomi
di tutti quanti li generazioni
ca' partinu da Abramu a Maria
matri Cristu omu comu tia.

Ci su accussì masculi e fimmini
santi eroi briganti e pagani
travagliatura e nun vo' fa nenti
civili surdati patruna e sirventi.

Canusciri sti cosi fani mali
quannu pensi essiri speciali
ca' nun ti tocca lu mali di Adamu
ca' trasi a casa nostra chianu.

Lu cuntu a la rovescia già parti
tu ca' l'aspetti sinceru d'unni si
'na pagina bianca d'o diariu
o prontu a cantari lu rusariu?

18/12/2020

Lu sonnu di lu giustu nun è morti
ma fari beni a cu porta 'nta lu cori
ci fa mali assa' na mala sorti.

Giseppi e Maria coppia d'Amuri
accussì hannu sempri a caminari
signati pi amuri e duluri.

Maria dissi si pi Gesu Sarvaturi
Giseppi dopo lu sonnu travagliatu
purta' 'ncasa Maria e lu Signuri.

Strani modi usa Diu amatu
voli la to chiù china azioni
offerta parola duluri e statu.

'nti l'annu di Giseppi patriarca
aiutalu a fari riserva putenti
di umanità nova tutta di marca.

'ni stu Natali di granni eventi
nun ti scantari si unicu a lu cori
di cu ti ama filici e cuntenti

19/12/2020

Acchianu a l'artaru d'u Signuri
e offru 'ncenzu ca' fa oduri
nun offru pi prighiera personali
ma rappresentu li credenziali.

Ddu jornu fu di Zaccaria levita
maritu di Lisabetta ca' è privata
di na maternità bedda sirena
e chiangi pi sta granni pena.

Nun cridi chiù ca' ci sia na mossa
e si porta stu duluri a la fossa
quannu ca avi lu 'ncinzeri 'manu
affaccia Gabrieli angilu sanu.

Nun chiangiri chiù finì la pena
Lisabetta ti regala na curuna
ti porta un figliu lu chiù granni
tu l'ha chiamari accussì Giuvanni.

Troppu bellu troppi forti
iu aspettu sulu a morti
resta mutu pi novi misi
nun cridisti a li prummisi.

20/12/2020

SI BEDDA MARIA
Si fussi artista facissi di tia lu quatru chiù beddu ca a lu munnu ci sia
Si bedda Maria
Si fussi architettu a lu munnu chiù espertu facissi pi tia lu tempiu chiù granni e sullenni
Si bedda Maria
Si fussi scritturi cuntassi di tia lì cosi chiù beddi pi un munnu cuntenti ca' cuntasti a Giuvanni
Si bedda Maria
Si fussi poeta trovassi pi tia lì versi chiù granni ca' toccanu l'armi di tia 'namurati ca' cu tia fannu sati
Si bedda Maria
Si fussi viandanti cuntassi di tia a tutti li genti li granni purtenti c'ha fattu pi mia
Si bedda Maria
Si fussi 'namuratu di litteratura ti vidissi danzari 'nta na vecchia stesura chiamata sacra Scrittura
Si bedda Maria
Si fussi musicista facissi na Sinfonia ca' ferma tutti pi la via e cantari fa a tia in grannj cumpagnia
Si bedda Maria
Si nenti di ssi cosi sacciu fari e scopru ca' si tu ca mi vo amari na cosa sula scrivu pi la via: A-VIRMARIA
SI BEDDA MARIA

21/12/2020

Cu Maria c'acchiana la muntagna
mi movu adasju cu un fasciu di ligna
canusciu la meta ch'è disiata
Lisabetta la cuscina appagata.

Ci va pi la nova ca' lassa' Gabrieli
fa girari la testa ed è china di meli
paria cosa ' mpossibili assai
quannu Diu parla mai diri mai.

Si piglia' la beata pirchi cridi'
tra na cosa e l'atra idda capi'
du mammi du figli cu tanti drammi
ma Diu parla e l'omu rispunni.

Cumincia cussi la danza di Maria
ricivi la consigna pi la via
va cu fretta la vita nun aspetta
è china di gioia sempri cuperta.

Va cu la Fidi nun temi cunfini
'ntona lu cantu ca' trema 'nte vini
a Diu cu poviri, urtimi, mali
Idda si ferma a l'essenziali ca' vali.

Virgini di la danza e di lu cantu
'nzigna a mia mi movu cu scantu
movi me passi sicuri 'ncaminu
a Betlemmi ad adurari u Bamminu.

22/12/2020

Mi fici un presepiu di furtuna
cu chiddu ca' truvavu 'nta cantina
petri lannuzzi cosi rutti
vistini e vistineddi arripizzati.

C'era puru na mezza culonna
e na pilicedda di lingnu vicchiaredda
na scatoletta di cioccolatini
cu spilli e buttuna di spallini.

Na carta stellata cu tantu traforu
piegata pulita mi parsi un tesoru
la grutticedda cu ligna di cucina
nun mancanu aranci ova racina.

La mannira di pecuri rintanata
sutta a muntagna vicinu a cascata
di maggi n'arrista' sulu unu
e lu misi vicinu a lu bamminu.

Lu sceccu e lu vo' puvireddi
su arridutti sfigurateddi
Maria è Giseppi vicchiareddi
ma restanu sempri chiù beddi.

Lu Bamminu però a la notti di Natali
è novu beddu e vistutu regali
nun lo trovi e nun lu cangi
cu Iddu la gioia senza Iddu chiangi.

23/12/2020

A chi servi generari
si po' nun ti po' realizzari
comu ti po' sentiri omu
si nun ci po' mettiri lu to' nomu.

Statti 'nsilenziu e aspetta
parla Maria e la matri Lisabetta
si chiama Giuvanni granni
comu fu predittu da lì vanni.

Iddu è chiddu Elia aspittatu
chistu nomu pirchi è distinatu
Zaccaria assa' avia suffrutu
pirchi avia ristatu mutu.

Ora tutti cu' 'mani la tradizioni
ci dumannanu di la situazioni
piglia' na tavulidda già cirata
e scrissi chiara la parola spirata.

GIUVANNI è lu so nomu
cussi lu chiama' Gabrieli 'ntronu
si sciugli so lingua e cantava
cu la genti 'nzemula ludava.

Quannu ca' operi sulu frati miu
resti sulu appena omu piu
lassa ca' Iddu opera pi tia
metti lu munnu tuttu 'ntornu a tia.

24/12/2020

Nasci nasci!
Nasci lu Suli è nova jurnata
nasci un juri è primavera
nasci frummentu è pani
nasci racina è vinu
nasci n'addevu è famiglia
nasci n'idea è poesia

Nasci GESÙ chi è Cu è?
Tutti l'aspittaru - lu celu lu chiama' - picca lu canusceru - chiù picca l'accittaru.
NATALI chi è?
La to' nova identità; la storia tua; la to' nova via.
Pi acchianari ha scinniri cu Iddu, po' va' comu un cardiddu.
Pi caminari ha vulari cu Iddu, po' fa' tuttu comu n'aceddu.
Pi fari festa prima attraversa la timpesta: chiangi, ridi, grida, tussisci po' si liberu comu un pisci.
Lu Signuri ti manna pi cuntu so' - la natura ti canusci pi parti so- l'omu trova na soru e un frati.
Nun c'è chiù nimicu né competizioni, ma sulu amuri di predilezioni.
NATALI: facisti a tutti regali e a CRISTU chi ci purtasti pi amuri? Facemu festa senza lu Criaturi? BUON NATALE di Vera Umanità e Fraternità.

25/12/2020

Un Presepiu fici picciliddu
unni scava' assa' lu surciteddu
mi mangiavu lu fruttu di la nuci
po' la puliziavu pi la Luci.
Un petalu di rosa ci trasivu
ca' d'inchi tutt'u funnu comu celu
'nterra na fuglitedda di oliva
ca paria precisa na trizzera.
Punti di spini santi appizzavu
stiddi luccicanti addivintaru
na curteccia di piru po' ci misi
ca' fa di grutticedda senza spisi.
Tunnu tunniddu di pipi biancu
Bamminu c'u gigliu vistutu
cu na bacca ci fici la Madonna
san Giseppi tiravu di na scunna.
Semini colorati dà ittati
furmaru li pecuri guardati
fogli virdi e gialli sistemati
li genti a la grutta 'ncaminati.
Puru l'angili 'ncoru a cantari
cu filiddi d'oru arraccamati
spazio c'è chiù 'ncori di n'addevu
presepi sempri vivu davveru.

26/12/2020

Arriva vintise' lu Nataluni
e cumencia la prucissioni
la grapi Stefanuzzu sirvituri
di Cristu a li tanti mangiaturi.

Ci porta la Parola e lu pani
pi mettiri addritta li cristiani
nun ci manca no' luci di lu celu
acceca cu porta ancora lu velu.

L'accusanu di essiri tradituri
di lu tempiu santu d'u Signuri
la novità Cristu risuscitatu
porta religioni no' di statu.

Nun suppurtavanu la so' luci
Cristu Parola a viva vuci
e comu Elia vidia celi aperti
e angili beddi a visi scoperti.

L'ammazzaru tirannuci li petri
affidaru a Saulu li vistiti
mentri iddu santu e binidittu
prigava: "pirdunali" comu scrittu.

Stefanu santu ca' pirdunasti
prega tu pi nuatri piccaturi
pi ristari cu Cristu Redenturi.

27/12/2020

Chistu è Giuvanni di lu cori
ca' sintini chiddu di lu Signuri
'nti la notti di lu tradimentu
e la gioia d'un granni documentu
scrittu no' 'nta carta ma ni lu cori
sulu cu la lavanna di li pedi
faciti chiddu ca' haiu fatti iu
amativi comu iu v'aiu amatu.

Stava cu Giuvanni vattiaturi
quannu lu talia' lu Sarvaturi
ci addumanna' unni abitava
e si ni ij cu Iddu po' na prova
erano lì quattru quannu scura
lu cunta' a tutti comu prima ura
ci fici cumpagnia a lu Signuri
ni li granni momenti cu premuri
erano sempri li tri veru granni
Japicu e Pitrinu e Giuvanni.

Ni l'ortu tutti tri s'addummisceru
e anchi chistu resta un misteru
però fu sulu a li pedi d'a cruci
cu Maria li fimmini e la luci
ca' lu purta' j
Ca' lu purta' lu primu ad arrivari
a la tomba vacanti pi gridari
la gioia di criditi e sarvari
lu munnu sanu d'u prevaricari.

Fu accussì ca' muri si du voti
'nta l'ogliu e l'anni assa' mali noti
lassa' Vangelu e Apocalissi
pi caminari diritti 'nta l'ellissi
tu Giuvanni cu l'aquila regali
nun lassarini suli 'nta li mali
semu cuntenti di leggiri a tia
tu portani dirittu a lu Messia.

28/12/2020

Quannu ca si pirderu li Re magi
e arrivaru a la corti cu li raggi
comunicaru di la nascita d'un Re
e addumannaru beddi d'unni è.

Successi un parapiglia 'mpalazzu
Erodi arriva' da cani pazzu
cunvoca' tutti lì so consigliera
saggi cartomanti e fattucchiera.

Vogliu sapiri chi c'è nu me Regnu
ca' nasci un re senza lu me 'ngegnu
lu Messia a Betlemme di Giudea
lu dissi Iddu lu profeta Michea.

Itilu a circari e truvari
puru iu vogliu iri ad adurari
nun vinniru li magi lu 'mbrugliaru
manna' allura surdati a panaru.

Ammazzaru l'addevi di di anni
lu Regnu so rista' accussì indenni
addevi nichi ca' accussì muriti
matruzzi sfortunati ca' chiangiti.

Tuttu era scrittu e si sapia
Iungemuni a Racheli pi la via
nun vulemu justizia pi favuri
chiangemu e suffremu pi amuri.

29/12/2020

Simeoni va a lu Tempiu santu
s'accompagnava Anna cu lu cantu
aspittava cu tutti lu Messia
pocu chiù di quarcunu ci cridia.

Jave' Nun lu scurda' e lu premia'
a la venuta so Iddu ci sarà
da matina di simana lu 'ncuntra'
lu canusci l'abbrazza' e l'adura'.

Cu lu cantu tuttu so lu saluta'
ora mi ni pozzu iri si di ca'
li me occhi vidinu lu Signuri
lu Sarvaturi chinu di amuri.

Pi nostra santa cunsulazioni
Iddu è signu di contraddizioni
Maria avrà lu cori trapassatu
pi risanari ogni omu malatu.

Anna puru cuntava cu lu cori
cosi strepitusi di lu Signuri
faciti postu dicia o Messia
'ncarnatu ni stu Bamminu pi mia.

30/12/2020

Lu duci di lu Natali
nun è sulu panettoni
mancu tavula cunzata
colorata avvinazzata.

Lu duci di lu Natali
è na Festa universali
semu 'ntunnu a lu Signuri
nostru veru Sarvaturi.

Ca' nasci dda' a Betlemmi
mangiatura e picca panni
po' arrivaru li pastura
cu ricotta e virdura.

Arrivaru puru Magi
cu profumi e doni saggi
e ci dissiru tutt'in tre
si Diu, Omu e puru Re.

Sugnu iu lu destinatu
pi 'ncuntrari appena natu
lu Bamminu ca' cumincia'
nova Era di Verità.

Fanni santi appressu a tia
nun ni perdiri pi via
chista Era cristiana
possa essiri chiù umana.

Riflessioni dal 01/10/2021 al 31/10/2021 - Domenica, 10 Ottobre 2021 11:24

Riflessioni dal 01/09/2021 al 30/09/2021 - Domenica, 10 Ottobre 2021 11:19

Riflessioni del 29/08/2021 al 31/08/2021 - Domenica, 10 Ottobre 2021 11:08

Riflessioni dal 01/07/2021 al 31/07/2021 - Venerdì, 20 Agosto 2021 10:09

Riflessioni dal 01/06/2021 al 30/06/2021 - Venerdì, 20 Agosto 2021 10:00

Riflessioni dal 01/10/2021 al 31/10/2021 - Domenica, 10 Ottobre 2021 11:24

Riflessioni dal 01/09/2021 al 30/09/2021 - Domenica, 10 Ottobre 2021 11:19

Riflessioni del 29/08/2021 al 31/08/2021 - Domenica, 10 Ottobre 2021 11:08

Riflessioni dal 01/07/2021 al 31/07/2021 - Venerdì, 20 Agosto 2021 10:09

Riflessioni dal 01/06/2021 al 30/06/2021 - Venerdì, 20 Agosto 2021 10:00

La Parrocchia

Contatore Visite

Ultimi Eventi

Calendario Eventi

Ultimi Documenti Pubblicati e Modificati

Riflessioni dal 01/10/2021 al 31/10/2021

Riflessioni del 29/08/2021 al 31/08/2021

Riflessioni dal 01/09/2021 al 30/09/2021

Riflessioni dal 01/07/2021 al 31/07/2021

Riflessioni dal 01/05/2021 al 31/05/2021

Riflessioni dal 01/04/2021 al 30/04/2021

Riflessioni dal 01/06/2021 al 30/06/2021

Riflessioni dal 01/03/2021 al 31/03/2021

Riflessioni dal 01/02/2021 al 28/02/2021

Riflessioni dal 01/01/2021 al 31/01/2021