02/11/2020
Caminava 'nto viali
unni nenti è banali
taliava dda' dirittu
quattru paroli di scrittu
VITA MUTATUR
NON TOLLITUR
misteru parla latinu
e mi rimettu 'ncaminu
Pinsava ddi paroli duci
dinta u bordu da cruci
no' paroli 'ncruciati
messaggio di veritati
03/11/2020
Quantu scusi quantu 'mpegnu
a la fini quantu lagnu
pi po' diri a lu Signuri
nun ti pozzu fari onuri
Avi bisognu di tia
cu ti misi pi la via
lu fa sulu pi amuri
pirchi Iddu è Sarvaturi
C'è la scusa du tirrenu
ca' aspetta lu to trenu
po' nun mancanu pariglia
di lì vo' ca' t'impiduglia
P'arrivari a lu 'nguaggiu
meta si di lu zitaggiu
ogni cosa è 'mportanti
ma ti fa luna calanti
metti prima la so cena
unni parla e duna lena
mangia e bivi la so vita
pi n'eternita' 'nfinita.
La Fidi mi lu dici forti
c'è vita doppu la morti
Gesù risuscita' veru
realtà nova ca' è 'ncelu
Chistu cangia la me vita
fatta è di bona crita
destinata all'eternità
cu gioia vera e libertà
04/11/2020
Quannu ca' vitti lu Signuri santu
na valanca di genti a lu so latu
e darre' ad Iddu ni lu camminu
mangiari filici pisci e paninu
Si firma' e ci dissi chiaramenti
picchi nun rovinassiru li denti
stari si cu mia è na gran cosa
ma ci voli curaggiu e na spisa
Comu quannu ha susiri na turri
t'ha fari boni cunti, no cimurri
e quannu lu Re vani a la guerra
valuta li forzi: paci o sbarra
Tu lassa tutti così e po' veni
patri matri soru frati e beni
su' tutti cosi veri santi e boni
ma stari cu mia susi li toni
Pitrinu Matte' Iapicu Giuvanni
puru Paulu doppu tanti anni
lassaru tutti cosi e su filici
pi mia ca susu ora la me cruci.
05/11/2020
Stari cu lu Signuri è na festa
chidda ca' duna forti a la testa
e ti porta dirittu a lu cori
nuddu ca' lu ama soffri e mori
Dissiru a lu maistru di premura
comu ti la passi cu li piccatura
e li pubblicani ca' su' vinnuti
a favuri di l'urtimi vinuti
Comu lu picuraru ca' n'avi centu
ni persi una e vinci' lu ventu
pi tiralla fora di na brutta crepa
d'unni si sdirrupa' circannu l'epa
O comu fa la fimmina di casa
quannu nun trova la misura rasa
grapi sposta adduma tutto spazza
pi truvari la munita mezza pazza
Tutti du' fannu festa pi duviri
lu Patri eternu sulu pi amuri
festeggia lu cunversu 'nta lu celu
tu vidi pietati senza velu.
06/11/2020
Na statuetta di surdatu romanu
teni auta na crucidda 'manu
c'è scrittu "HODIE mihi" si chiaru
A li pedi un corvu nivuru nanu
di la vucca ci nesci na parola
"CRAS tibi" ca' dici pattu bonu
Qual'e' lu fattu picchi l'aureola
si cunvirti a Cristu Espeditu
la fici lesta a ghiri a la so scola
Cunfissa' a Gesù cu la via
di sangu virsatu pi la scelta
oj a Cristu dumani cu tia
Semu furbi amici e all'erta
scegliri Cristu oj è fatali
pi renniri bella la scritta certa.
09/11/2020
Cussi truva' lu tempio lu Signuri
chinu di vacchi pecuri palummi
cu cangiava e cu facia cummenti
cu li favuria nun dicia nenti
La me casa è casa di prighiera
ci dissi a li birbanti a schiera
cu na corda caccia' a tutti fora
e ci sdirrupa' li finti artara
Nun pottiru diri facisti giustu
cadianu 'nta l'erruri di lu 'ntressu
addumannaru sulu un signali
pi putiri li so carti appattari
Sdirrupati stu tempiu pi favuri
e iu 'nta tri jorna lu rifazzu
è proprio pazzu sintinziaru
sonna certu o parla senza sensu
Parlava di lu tempiu chiddu veru
ci abita lu Spiritu divinu
chiuddu ca' cria' l'universu 'nteru
e rinnova la facci di lu celu.
10/11/2020
"Cu nun servi nun servi" a chi servi
tutti parlanu di duviri mai di diritti
lu scrivinu 'nta li trattati nazionali
po' diventano duviri globali
Puru lu Signuri parla di duvira
Adamu ed Eva progenitura
ni misi po' la liggi 'nta lu cori
lu duviri ni servi pi campari
'Nta tutti lì posti c'è un duviri
ci corrispunni anchi un piaciri
tu nun lu fa pi cosa di aviri
ma picchi nun po' stari senza fari
Lu munnu è daveru avariatu
cu allorda cu scupa ed è cuntentu
cu chianta cu cogli e su filici
cu cumanna cu bidisci e su alici
Lu munnu nun dipenni di nuatri
ma lu facemu tutti pi la paci
mentri travagliamu pi li patruna
Iddu aggiusta e duna curuna.
11/11/2020
Aviri la lebbra nun è cunnanna
ti fa veru uguali di ogni banna
la saluti si fa la diffirenza
fa nesciri o scopertu to essenza
Nun c'è saluti senza la sarvizza
ca' è gratitudini e biddizza
ti rifà oguali ad ogni omu
tempiu pi prigari e gentilomu
Deci omini malati scacciati
in viaggio versu la saluti
li manna' a lu tempiu lu Signuri
pi aviri carta di guarigioni
Ci crittiru tutti e caminaru
versu la città ca' si scurdaru
fu docu ca' si vittiru guariri
ci fu cu turna' sanu a la riti
Unu sulu veni a ringraziari
samaritanu ca sapi prigari
e l'autri novi pigliaru la carta
scurdusi ca' chissu sulu non basta.
13/11/2020
Noe' Lot Sodoma e Gomorra
chi lettura strana pari na guerra
Gesù ca sta parlannu di la fini
e li porta pi esempi divini
Purtavu dissi focu divisioni
la fini torna pi conclusioni
la scelta finali di lu Regnu
pi rientrari tutti 'nta lu rangu
Sarà subitaniu comu nenti
guai a cu si vota talia genti
cu ci cridi è pigliatu pi jocu
ma è lu signali proprio docu
semu di ca' na nun semu pi ca'
edificamu già lu Regnu di da'
pari ca' tuttu di nui dipenni
ma è Iddu ca' crisci si t'arrenni
Signuri vegna prestu lu to Regnu
ricanuscimi sempri comu signu
aiutami a nun mollari chiuni
fammi chinu di l'amuri ca' duni.
14/11/2020
Omu ca' sedi la liggi nun è to'
pensa assa' beni cu ti la rigalo'
nun giudicari senza simpatia
po' perdiri lu scecu pi la via
Lu juduci disonestu d'u Vangelu
ascuta a cu avi maritu 'ncelu
non picchi cridi o temi lu Signuri
ma sulu pi stari 'mpaci pi favuri
La liggi di la giustizia divina
chidda di la prighiera ca' camina
di la terra a lu celu 'mantinenti
e trova la risposta ca' prisenti
Nun cangia responsu di lu Signuri
e duna cunsulazioni o cori
ma converti la vita a l'amuri
si movi passu passu cu la Fidi
Ca' quannu lu Signuri torna 'nterra
pi giudiziu finali no guerra
aprennu lu cori a la virita'
truvira' la Fidi e credibilità?
15/11/2020
Signuruzzu di li muntagni e di li campagni
architettu di li stiddi e di lu mari
ca' veni pi sarvari li criaturi
e li aspetti tutti pi amuri
Tutti così cunsignasti
cu sapienza ed equità
unu ad uno ad ogni omu
un pizzuddu di lu to nomu
Un pugniddu di natura
ci mintisti cu premura
po' più tutta to' bontà
ci agghicasti la libertà
Nun c'è jornu né misura
ogni ura cu primura
vogliu fari li duviri
la funtana di lu piaciri
Quannu poi Iddu veni
nun voli nenti pirchi tremi
t'addumanna quantu ha
e ti duna lu restu pi dda'
Nun si joca pi pareggio
jucari nenti è peggio
joca jetta fora lu timuri
lassa vinciri l'Amuri.
16/11/2020
Acqua viva dalla fonte
sei discesa nella valle
in silenzio assordante
Sei rimasta senza calle
operando il tuo manda fato
verità e niente balle
Ora un astro assegnato
ti consente di curare
fiori e frutta c'hai amato.
16/11/2020
Ti voli, ti chiama / amuninni/
allura è veru / chiddu ca' si dicia/ la biddizza di sta profezia / Gesù Cristu /quantu l'aiu circatu /nun ci ha statu versu / stamattina lu sintia / assittatu comu era / e dicia / a lu primu chi passava / chi succedi cu è / lu Signuri / ma no pi tia /
mi misi a gridari / Gesù figliu di David / mi sinti, mi chiama' / ora mi dissi / cu na vuci bedda / chi vo' / c'ha fari pi tia / ci lu dissi cu lu cori /
vogliu vidiri comu prima /
si la to fidi / porta conclusioni / aprili st'occhi / lu vitti / lu vasavu / grazii Signuri ci gridavu / tutti lu sinteru e cantaru / ora appressu a Iddu / la vita è n'autra cosa.
Gesù ca rapi l'occhi a li criaturi
rapili puru a nui pi favuri
veni chiamani ascuta
duna libertà la vita
nui cridemu sulu a tia
Gesù Cristu Vita Via.
17/11/2020
Nicareddu di statura
tantu granni pi cultura
ca' usava malamenti
pi rubari povira genti
Surdu a li reazioni
picca boni azioni
lu passaggio d'u Signuri
abbatti pareti duri
Comu a quannu Giosuè
vitti turri mura narre'
cu setti gira di l'arca
e fidi ci n'era picca
Zacche' acchiana' lu ramu
nun vidia nenti 'nchianu
oj mi fermu a casa tua
nun sapia ca' era Messia
nun si mangia' quasi nenti
ma detti tuttu a la genti
ripara' li mali fatti
pi la vita novi patti
Quantu voti ha vinutu
e nun m'aiu cunvirtutu
cangia lu me cori duru
fallu ponti e no muru.
18/11/2020
Gesù nun joca mai a ribassu
ci metti di lu so pi contrappassu
Ieri ni parlava di talenti
quarcuno però ci rista' dulenti
Oj parla di na munita fina
data a tutti uguali vita china
pari nenti ma è patrimoniu
cosa robusta di manicomiu
Unu ca' la 'nvesti ci arricogli
cosa comu na dicina di vagli
n'autru n'arricogli mita' veru
ma ci la misi tutta cavaleru
Ci n'è sempri uno ca' si lamenta
di stu re ca' voli munita tanta
lu guadagnu ci nega lamintannu
e ci la duna netta comu quannu
Signuri ni duni lu munnu 'manu
granni fiducia pi lu cori chinu
nun vo' nenti tu ci metti ancora
stari cu tia lu restu è prova.
19/11/2020
Quannu chiangi n'omu
li cosi nun vannu bonu
ma si chiangi Gesù Cristu
allura lu momentu è tristu
Paria a postu tuttu
nenti si vidia di ruttu
c'era lu cori troppu duru
nun vulia essiri sinceru
Ci bastava soccu avia
lu tempiu novu lu tinia
tra lu re e li romani
patti chiari e lu pani
Ma quantu a novità
lu cori chinu di bontà
nun si ni parla
mancu pi tracolla
Mancava a li Jude'
e a nuatri vide'
cunversioni a vita nova
e cu Paulu a la so scola.
20/11/2020
Pinsavamu di essiri li primi
quannu ca' a vera nostra 'gnoranza
cugliemu ' nta la vita li 'nghimi
Cristo c'era prima d'ogni organza
anzi fu Iddu ca' fici lu modellu
pi dari all'omu cantu e danza
Ora veni a purificari lu bellu
ca' misi 'nta la facci e lu cori
di l'omu pi starici a casteddu.
21/11/2020
Cantava na canzuna ca' dicia
di la nostra società
figlia d'u piaciri e d'u progressu
ca' itta' fora Diu d'u so passu
pi essiri libera di caminari
senza nuddu capurali.
Nun dissi ca' Diu avia murutu
ma nun c'interessava
mancu siddu c'era
pi fari chiddu ca' vulia.
Quarchi dirittu massimu 'ngalera
pi nun essiri comu cantunera
po' avanti famiglia, società
comu si po' fari si fa'.
Ci dissiru un jornu a lu Signuri
comu è la risurrezioni
si 'nta lu matrimoniu
ci su problemi?
Mirati a Mosè 'ncapu lu munti
lu rovu abbruscia e nun cunsuma
Diu è viventi
nasci n'addevu, si cunverti lu putenti,
lu primu torna a fari li sirventi.
Cristu è Diu viventi:
nun talia la nostra identità,
si ci rispecchia pi Carità.
22/11/2020
Trasiti nisciti di chi dipenni
qual'e' la logica di sti facenni
mi dumannu e dicu di na vita
la liggi mi scaccia' tutti lì ita
No nun è problema di li cumanni
e mancu la lettura di li Vanni
chista è na cosa pi tutti nova
comu fussi criata ora ora
Quantu beddu e bonu lu Signuri
canusci tutti li so criaturi
sapi ca' la liggi nun avi cori
e li cunnuci sulu pi amuri
La liggi fici nova: "biatu si"
ottu voti dissi e si cummuvi'
po' si fici poviru dimanneri
amuri, carità comu 'ncanteri
Avi dirittu si di essiri Re
muri trafittu 'ncruci ancora c'è
lu poviru è Iddu nun circari
nun ci duni nenti lassati amari
A la fini ti dici trasi o nesci
pi la scelta tua ca Iddu pasci
tu servi lu poviru ni stu munnu
Cristu ti duna gioia senza funnu.
23/11/2020
Dari quarchicosa a lu Signuri
è bellu dignu e ti fa onuri
nun ci dari però chiddu ca' resta
o chiddu ca' ti passa pi la testa
Cristu non avi nenti di bisognu
ti lu dumanna sulu comu signu
ca' facisti un passu da amicu
ti fa riccu filici no minnicu
L'addevu ci detti si lu panuzzu
chiddu ca' purtava senza prezzu
quarcunu ci desi puru lu scecu
nun si lamenta' no mancu un pocu
Na fimmina ci detti du munitini
senza nuddu scrusciu di tamburini
allura chiama' a tutti lu Signuri
e canta' a tutti lu so valuri
No donna di curaggiu ma di fidi
si misi 'manu a lu Criaturi
mancu fici patteggiu permanenti
24/11/2020
La Sapienza di Diu sempri resta
chidda di l'omu comu carta pesta
la prima architetta all'infinitu
l'omu prova a scavari lu criatu
Gesù parla di lu Tempiu li petri
di Gerusalemmi veru sollatri
ca' pi manu di vecchi talebani
farà na fini misera e 'nfami
E però ristira' dintra lu cori
di cu nasci crisci e mori
cu la Fidi 'nta l'unicu Signuri
di Abramu Isaccu Israeli
L'omu crea distruggi e po' ritorna
va a la ricerca di sana norma
Diu fa lu Tempiu ca' nun cadi
l'omu ca' risorgi e chiù nun mori
Nun taliari a cosa succedi
tu postu pi 'ncuntrari lu Signuri
tirrimoti pesti fami guerra
fannu postu a tantu virdi 'nterra.
25/11/2020
M'innamuravu di Gesù
nun cercu nenti basta chiù
resta centru d'a me vita
tuttu bellu comu sita
Lassavu tutti lì cosi
scartavu anchi li fusi
pi aviri cori chinu
duci comu mandarinu
Si la festa pari picca
e arriva la timpesta
nun è curpa d'u Signuri
nun sopportanu l'Amuri
Mancu su chiddi di fora
a chiantariti li chiova
cu ci sta sempri cu tia
ca' ti porta da' pi via
Umanu ca tremi scantu
ma diventa prestu vantu
pensa puru li capiddi
ti sarva' comu li stiddi
Teni forti nun mollari
nun ritarda pi viniri
chista è redenzioni
tu si binidizioni.
26/11/2020
'Nprincipiu era la Parola
quannu nun esistia mancu una
ca' cria' l'omu a so manera
pi stari ci Iddu in alta sfera.
Ma chistu babbu si talia' 'nti l'acqua
si vitti beddu e si ni 'namura' d'iddu
vutannu li spaddi a lu celu
rista' a taliari sulu 'nterra.
Ci dissi: talia beddu
mi fazzu comu a tia
e tu resti sempri cu mia
torna a taliari 'ncelu
di da' iu vegnu.
Passaru secoli tuttu si avvera'
pirchi Iddu è Verità
resta cu nui Parola e Pani
e vinci anchi li tafani.
Ora aspittamu l'urtima vittoria
di tali grannizza nun c'è memoria
semu pronti ad ogni cosa
pedi 'nterra e cori 'nposa.
Quannu ca' veni l'abbrazamu forti
pirdunani tutti lì torti
campari è sulu chistu ca'
Tu si Via Vita Virita'.
Un rigalu ni fici pi la via
la Matri so la virgini Maria.
27/11/2020
Donna la chiamani lu Signuri
'nta lu jardinu pi amuri
di Adamu ca pinsava
tuttu è miu, cu sparti cu mia?
Donna ci dissi Adamu
quannu s'arrisviglia' e da' la vitti
tu si ossu e carni mia
iu hai lu nomu comu a tia.
Siti na cosa sula, dissi lu Criaturi
ognunu lu so compitu a duviri
china parità pi campari
tuttu vostru di la muntagna a lu mari.
Lu sirpenti ci misi la cuda
e si sirvi di Eva ca' era nuda
ci arrubba' la nuccenza criatura
vutannula contru Diu e la natura.
Prumisi allura nova criazioni
e la chiama' Redenzioni
cu Gesù ca' vinci lu sirpenti
e Maria la donna vincenti.
28/11/2020
Era da' davanti cu l'occhi a l'orizonti
davanti a tia ca' parlavi ca' cu mia
'nsileziu mutu e t'ascutu
Mi si d'inchi lu cori sintenu li to paroli
e mi fazzu assa' pigliari
a lu sulu to parlari
Ma quantu haiu pirdutu
pi nun ristari mutu
La to Parola è la granni scola
e 'nsignamenti stupendi tu prisenti
risparmiu energia comu 'nta na Batia
e tanta saluti quannu ristamu muti
Cu la paci ca' mi duni
mi guadagnu lu sirruni
restu a cuntemplari suli mari e aquila vulari
cussi mi sentu leggiu ascutariti è privilegiu.
Mutu vidu e sentu chiossa'
e parlu cu lu cori
ca' annulla lu rumuri
e la musica appena desta
m'accumpagna a la festa.
30/11/2020
Niria, omu di la prima nova via
eri cu Giuvanni a la decima ura
quannu ti ni isti darre' a Cristu
pi na granni avventura e lustru.
Lu dicisti a Pitrinu e lu purtasti
a Iddu cumu lu Messia
e ti pigliasti lu granni cumplimentu
"Omu sinceru senza falsità".
Nun ti chiama' pi fatti cummoventi
la to fidi resta soda e risplendenti
scappasti comu tutti a la passioni
cridisti cu tutti la risurrezioni.
Cu lu spiritu 'ncori ti ni isti
'nti l'Asia minuri a cunfissari
Gesù risuscitatu Sarvaturi.
Ti cunnannaru a la cruci
e ni pigliasti una speciali
chidda ca' scrivi Redenturi.
Cussi tutti ti 'ncuntramu a liveddu
Cristu scinni sinu a stu puntu
ora aiutani a 'ncuntrari lu Signuri
e ristari sempri cu Iddu a tutti l'uri, sulu pi amuri