02/09/2020

Lu diavulu va a la missa - pensa di vinciri cu na mossa / "iu ti canusciu Gesù Cristu - ma luntanu di tia mi ni restu" //
"Vatinni brutto bestia 'nfirnali - lassami l'omu è me capitali / lu guadagnavu supra la cruci - tra dulura, sudura e vuci //
"Ma mi guastasti la festa - criasti dintra mia la timpesta" / cussi sinni ji senza fari dannu - aieri, oji, ad ogni so' cumannu //
Amici ca' priannu a lu Signuri - stamu vicinu a Diu cu primuri / ni libera di lu diavulu e lu 'nfernu - ni perduna pi sempri in eternu //
Nun talia né sogira né nora - sulu l'omu misu a dura prova / dunna c'è bisogno Iddu c'è - ti senti diri: "e tu vide' "

03/09/2020

Pitrinu, piscaturi fa cilecca - "ora jetta la riti, jetta" / ci dissi lu maistru - "nun ti scantari, fallu prestu" //

"Matri santa, chi situazioni - unni era sta binidizioni?" / chiama' in aiutu a li cumpagni - "chi pisca, chi pisca granni" //

"Sugnu nu granni piccaturi - vatinni, Signuri, pi favuri" / Petru, babbu, veni cca' - nun è erruri to' in verità //

Ti chiamu a usari novi riti - fatti pi l'omini pirduti / e tu aiutami a sarvari li genti - sempri, unni de je: isole e cuntinenti

04/09/2020

Dijunu o mangiari - chi vali meglio - e farisi perdunari /
Essiri sempri svegliu - aspittannu lu zitu - anchi si è travaglio /
Sonnu, vinu, vistitu - preparati a la festa - lassa fermu lu spitu /
Travaglia cu la testa - vecchiu e novu - fannu tempesta /
Festa nun è covu - ma biddizza, musica - la cercu, la trovu /
Cristu, presenza mistica - prummisa mantinuta - su tavula rustica /
Duminica vissuta - luci, piatti, vasi - semu a la cirnuta /
Cu arriva' trasi - si chiudi la partita - ma la festa nun finì.

06/09/2020

Riassuntu di lu Vangelu - stari 'nzemula daveru - nun cuntanu li paroli - ma crisciri cu lu Signuri /
Ci metti tutti lì credenti - brava e bona genti - tutti d'accordu pi priari - senza problema a pirdunari /
Si uno sbaglia aiutamu - senza scannalu caminamu - pronti a fari così boni - liberamu tutti di mali azioni /
La Dominica stamu beni - boni, tinti e Gesù ca' veni - conferma li divuzioni - e chiama tutti a cunvirsioni /
La vita vera è na parola - bella comu na stola - Vangelu eterna verità - ca ni sosteni 'nti la carità.

07/09/2020

M'insignaru ca' si cunnanna - quannu ca' si supera la canna - cu fa mali a li frati a li soru - ammazza, arroba, duna cloru //
Avi a muriri, picchi fici beni - libera' li malati di li peni - pirduna' li piccati a li genti - cunvirtitivi dissi a li putenti //
Picchi congiuranu li genti - cantava lu profeta nuccenti - nun caperu ca' purta' libirta' - di amari e serviti 'ncarita' //
Cu ti cria' senza pirmissu - nun ti sarva senza cunfessu - e fu accussì ca voli amuri - Cristu ca' resta Sarvaturi.

08/09/2020

Na scocca rosa c'è davanti - di Anna e Jachinu, du giganti - Diu ci l'iva' la tintazioni - nun c'è chiù malidizioni //
Di na fimmina avia parlatu - lu Patri a lu sirpenti refutatu - ca' avissi scacciatu la so testa - pi l'umanità ca' torna a fari festa //
Chistu è lu jornu binidittu - ca' cunta Matte' 'nta lu so scrittu - cu tanti nomi tanti tanti - di fimmini, re, santi e briganti //
Ginirazioni nun su cunfusioni -sunnu sulu tanti binidizioni - c'è lu munnu tuttu in corti - ca' godi di la so nova sorti //
C'è Aurora prima di lu Suli - l'apostuli cu Maria cori di mari - po' nuatri ca' facemu festa - a la Bammina ca' ni libera di la tempesta.

09/09/2020

Filicita' cerca lu ti cori - nun c'è dintra né fori - senza dulura è avvenuta - senza amuri è sulu duluri //
A la cruci la gran prova - docu Cristu t'aspittava - Diu ca' cerca Amuri - quannu ca' ci spaccanu lu cori //
Gioia nun è aviri e cumannari - ma Diu ca' cerchi cu lu cori - già lu truvastii sulu amuri - e nun ti scanti di pirsicuzioni //
Allura vidi la genti 'ncatinata - mezzu a lì beni 'mpidugliata - capisci allura ca' arrivasti - a lu postu chiù guatu di la gita //
Nun ti 'nteressa l'approvazioni - picchi si già 'ncuminioni - cu Cristu, la chiesa e li santi - tu ca' nun si amicu di li briganti.

10/09/2020

Semu cristiani e felici - ma a li voti facemu picca luci - ni lamentamu continuamenti - pi li guai di lu cuntinenti /
Lu Signuri uno ad unu ni lu dissi - succu Luca po' ni scrissi - vo essiri primu vo fari carrera - trasi 'nta lu ti cori e fa minera /
Scava liberati di lu pisu - superbia, 'nteressi, vrazzu tisu - in ogni omu c'è un frati - anzi Cristu vicinu senza grati /
Ama a tutti nun ci su nimici - fa beni aiuta cu ti malidici - la minnitta è na cosa truci - nun ci sta cu Cristu 'ncapu a cruci /
Amuri veru nun avi mura - lu so metru è senza misura - Signuri, si troppu forti nun ti lassu - anchi si mi facisti contrapassu.

13/09/2020

Occhiu pi occhiu denti pi denti - ti perdunu e nun si fa nenti - ma quantu ancora avi a durari - nun si ni po' chiù di pirdunari //
Possibili ca' nun ti po' sciarriari - ca' a fari li cunti cu priari? - ognunu boni si fa li so cunti - e camina sicuru cu tanti punti //
Lassa nun ti perdiri pi nenti - trovati autri componenti - storia, archi e monarchi - e continua a spingiri li varchi//
Chista di GesùCristu è tutta nova - perdunu sempri a tutta prova - chi valuri avi sta novità - si po' nun cangia cu sbaglia' //
Nun servi a Iddu è tutta pi tia - sarva lu to cori di la malatia - ti d'una tutta china libertà - e gioia e amici 'nquantita.

14/09/2020

Mi parsi un cinamu un tiatru - la tila cala', la porta si chiudi, la storia fini - no amici mia, la storia cuminciava, l'amuri ripigliava, la macchia si allargava - la cruci è ancora dda', Cristu risuscita', viva la cruci, Cristu è l'amuri duci - nun ni detti sentenza di cunnanna, ma di clemenza - ni misi a lu so latu: chi briogna, a cu ti pigliasti, cu ccu ti mintisti, a cu adurasti, - veni cu mia babbu, canuscilu prima, stacci chiù vicinu, po' mi dici comu è lu vinu - veru è nun l'avia caputu, è comu lu focu, comu la luci, viva la cruci, quannu cu iddu la porti - diventa cristianu, nun ristari paganu, dunaci na manu, attaccati a la cuci e jetta ora na vuci: W LA CRUCI W MARIA

15/09/2020

Tri dedde' ni misiru davanti - di la Matri di Diu onnipotenti - Addulurata e Matri 'nchiantu - ca' ni cummoglia cu lu so mantu //
Maria, curri c'è Cristu, la cruci - du manu l'occhi na vuci - nun si toccano nun è faglianza - ma redenzioni di Diu onnipotenza //
Po' c'è la cruci e Cristu 'nchiuvatu - Maria a li pedi di l'omu flagellatu - ci vasta a tutti du matri e figliu - pi l'opira nova di risvigliu //
Pi urtimu c'è Maria assittata - ca' abbrazza la vita astuta - canusci lu so misteri maternu - dari la vita, scattari lu 'nfernu //
Tri momenti di la vita di Maria - opira di amuri pi mia pi tia - Addulurata donna forti - dunanni la Vita vinci la morti.

17/09/2020

Lu Suli ca' vagna - lu jumi c'asciuca '- cu lu scrissi ssu cuntu - tuttu veru succidi' - nni Simuni fariseu - ca' 'nvita' lu Signuri //
Trasi na fimmina - e Simuni si 'ncuita' - ma prima chi parlassi - fu 'nvitatu a giudicari - tra dui dibitura sdibitati - e cu l'ama' chiossa' //
Cu appi chiù perdunu ci dissi - bravu lu Signuri concludi - tu ha picca debiti - idda assa' piccati - tutti du pirdunati //
Lu suli ca' chiovi - lu jumi ca' assorbi - è tuttu amuri - e chi putia sapiri - poviru figliu - santu e giustu gigliu - chidda mischia umiliata - di chistu e chiddu strapazzata - e pi mangiari nun sapia chi fari //
Signuruzzu chi pirduni - dunami di mai giudicari - la ricchezza di lu chiantu - e capiddi abbunnati - t'assicutu d'unni va - pi aviri Carità.

18/09/2020

Un jornu ca' Gesuzzu caminava - e la bona notizia purtava - si firma', si vuta', li cunta' - dudici picciotti, lu nicissario - e na cinchina di fimmini //
Tutta la ricchezza di cu nun avi - terra, casa, né dimora fissa - l'apostuli hannu valia - pi chiddu ca' lassaru - di lu Signuri si fidaru //
Li fimmini, novità, vannu a la scola - e 'ntantu liberati, pirdunati, fortunati - proinu quarchi cosa - nenti a dari, nenti ad aviri - e però hannu putiri - a so tempu di annunziari - di Cristu la Risurrezioni //
La scola beni ci fici - l'arvuliddu misi boni radici - la Chiesa accussì camina ancora - cu omini picca e fimmini finu a fora //
Du cosi amici vi vogliu diri - masculiddi, nun ni gloriammu assa' - avemu granni responsabilità - fimmineddi, no lamenti, ma cantu - granni è lu vostru vantu - ca' canuscistivu a Cristu cu lu chiantu.

19/09/2020

Unn'avia finutu di metiri e pisari - e turna' a dominati - simenta scelta - bona e abbunnata - //
Ma comu si fa a siminari - mezzu a la strata - a li preti e a li spini - e po' 'nta li tirreni latini - a cu ci addumanna' spiega' - lu turrenu 30-60-100 - po' simenta - nuddu avi a diri ca' manca' - a nudda banna //
È sarvizza, lu Regnu - cu ni cria' liberi na proposta ni fa - si ci vo stari, vidi chi po' fari //
Signuri cori granni - cu tia vogliu stari a tutti banni - fammi 'namurari di tia - di lu to beni Parola e Pani - fammillu mangiari 'ncumpagnia - e' duci e fa chiù beni - cusinni cu tia a na vuci - pirchi sulu Tu sì Via Verità Vita e Luci.

20/09/2020

Nun è giustu ci dissi l'operaiu - ca' vitti pagati a forfettariu - si t'avissi pagatu quanti vali - nun putivi dinchiri lu boccali

Parlamu no di nummari e cuntrattu - ca' pi la me vigna iu sugno mortu - è regalu preziuso un tesoru - ca' fazzu a ogni omu pi cunsolu

Cercami figliu miu mentri ha tempu - ancora 'ncapu terra veru grembu - ogni criatura parla di mia - forza sugnu cu tia pi la via

Dunami lu cori nun ti ni penti - chistu è lu postu giustu prisenti - e po' statti vicinu a Maria - criatura chiù meglia ca' ci sia.

23/09/2020

Franciscu si chiamava a lu vattiu - Forgioni lu cugnomu viva Diu - Piu po' a la fini in religioni - tra li frati minori cappuccini

Na vita tremenda travagliata - ci cria' la bestia scatinata - Cristu misi allura li stimmati - pirchi è granni si cu Iddu pati

Si scatinaru allura li vispuna - ca' la Chiesa e la midicina duna - puru Gemelli granni scienziatu - pi so granni duluri carzaratu

Prima e dopo è sulu cunfissuri - ca ascuta, pirduna e fa rumuri - di grazia e di natura corporali - tra lu confissionali e lu spitali

Talia puru a nuatri patri santu - stamu campannu tra lu scantu - liberani di lu virus ca' rinasci - e l'arma nostra di Parola pasci.

24/09/2020

Signuri aduratu - io di tia beneficatu - cercu la to facci duci - Gesù Cristu misu 'ncruci

Pirchi nun mi dici nenti - luci eterna si prisenti - 'nti la santa Eucaristia - pani e vinu ca' pi mia

Po' aprivu lu Vangelu - riccu beddu un Carmelu - sapienza incarnata - ogni omu so facciata

Ni rivela Eternu Patri - cu lu cori di na matri - e ni apri a lu so amuri - sempri cu tuttu lo cori

Virgini santa Matri Addulurata - fanni stari cu Cristu in curdata

25/09/2020

C'è un omu, anzi un re - s'addumanna chistu cu è - Cristu stessu dici pi via -
la genti chi dici di mia

Tutti sanno soccu diri -
vui c'aviti di cuntari -
Petru sulu ca' proclama -
tu sì Cristu ca' Diu ama

Nun dicitilu a nuddu -
dissi tra capu e coddu -
avi tantu di suffriri - crucifizzatu muriri

Tri jorna e po' turnari - risuscitatu campari -
in eternu redenturi -
di lu munnu cu premuri

Restu vicinu la cruci -
cu Maria la santa vuci - chista è la nostra vita - ricreati cu nova crita.

27/09/2020

Cunvertiti, cridi a lu Vangelu - dissi cu la cinniri lu parrinu - 'ncapu la me testa di merculedi - quannu ca' lu carnivali ni finì

Lu dissi ancora oj lu Vangelu - ca' parlava di figli e catoiu - figli ca' si permettinu di jucari - piccatura pi seriu a turnari

Sintivu arrifriddari li me ossa - capivu ca' ni parlava di la sccossa - la vigna è mia e l'aiu a putari - nun pozzzu lu Signuri babbiari

Turnari narre' è la cosa diritta - comu la strata cu la curva stritta - chistu è lu sigretu di la vita - fatta di nobiltà e no di crita

A lu Signuri la me riconoscenza - un pugnu di coraggio e pacienza - tanta umiltà ca' è verità - e lu me passu cu tranquillità.

29/09/2020

Micheli Gabrieli Raffieli -
tri angili scinnuti da li celi -
ti 'nsignanu cu è Diu santu -
e l'omini misi a lu so jancu.

Cu è Diu, cu, mi dici Micheli -
nun è sulu distanza ca' ti teni
talia la to facci di d'unni veni
Iddu ti la desi ci apparteni

Senza Diu si nenti e nuddu -
ti duna forza 'nta lu so casteddu -
lu Signuri ti manna Gabrieli
pi la to missioni latti e meli

Morbi malanni Lucifiru purta'
pi chissu Raffieli ca' arriva'
pi caminari 'nta la strata nova
guariri di la granni nostra prova

L'angili vannu vennu sunnu ca' -
nun c'è chiù distanza cu l'eternità -
ti renni cuntu quantu tu si granni -
l'angilu di Diu a li to cumanni.

30/09/2020

Si cristianu tu pirchi ti ama
a la so scola tu pirchi ti chiama
la to furtuna è granni amicu si
arrivasti giustu unu di e tri

Cu si pronta' si scanta' e si firma'
troppu avia a lassari pi bontà
nautru fu chiamatu si ni pinti
lu patri anzianu lu cummuvi

Chistu è posto to fratuzzu miu
ca' lassasti sbalanzu a fini riu
grapisti la Parola cosa granni
e fusti 'luminatu di tutti banni

Ora ca' si biatu a la so scola
attentu nun lassari la so stola
talia sempri avanti mai darre'
l'aratu tira surcu e forma Re

Stari a la scola di lu Signuri
ti duna un saccu di valuri
ca' è Parola e Pani 'quantita'
pi la gioia e la santa libertà.

0
0
0
s2smodern